Ibirori byo gufungura ku mugaragaro Igikombe cy’Isi cya 2026 byaranzwe n’udushya twinshi ndetse n’ibyamamare bitandukanye byitabiriye uyu muhango wari utegerejwe n’abakunzi ba ruhago ku Isi yose. Mu bayoboye ibi birori harimo umukinnyi wa filimi w’icyamamare wo muri Mexique, Salma Hayek, wakiriwe n’amashyi menshi ubwo yagaragaraga imbere y’imbaga yari yateraniye muri Stade Azteca. Uyu mugore w’imyaka 59 y’amavuko yahawe inshingano zo kuyobora igice cy’ingenzi cy’uyu muhango kubera uruhare rukomeye afite mu kumenyekanisha umuco n’ubuhanzi bya Mexique ku rwego mpuzamahanga.
Salma Hayek ni umwe mu bakinnyi ba filimi bafite izina rikomeye muri Hollywood no ku Isi yose. Yamamaye cyane binyuze muri filimi zakunzwe zirimo Desperado, From Dusk Till Dawn, Frida ndetse na Tale of Tales, zamufashije kubaka izina rikomeye mu ruganda rwa sinema. Kuba yaratoranyijwe ngo ayobore ibirori byo gutangiza Igikombe cy’Isi byafashwe nk’icyubahiro gikomeye kuri Mexique, igihugu kiri mu byakiriye iri rushanwa hamwe na Leta Zunze Ubumwe za Amerika na Canada.
Mu mafoto n’amashusho yakwirakwiye ku mbuga nkoranyambaga, Salma Hayek yagaragaye yambaye imyambaro yihariye yagaragazaga umuco wa Mexique, ibintu byashimishije benshi mu bari bitabiriye uyu muhango. Abakunzi ba ruhago n’ab’ikorwa rya sinema bashimye uburyo yitwaye muri ibi birori, bavuga ko yatanze isura nziza y’igihugu cye imbere y’amamiliyoni y’abari bakurikiye uwo muhango ku Isi yose. Uyu muhango wabaye intangiriro nziza y’Igikombe cy’Isi cya 2026, irushanwa ritegerejweho amateka mashya n’udushya twinshi muri ruhago mpuzamahanga.
