Umuhanzi w’indirimbo zo kuramya no guhimbaza Imana, Israel Mbonyi, yamaze kugera mu Mujyi wa Bruxelles mu Bubiligi aho ategerejwe gukorera igitaramo gikomeye ku wa 13 Kamena 2026. Uyu muhanzi ukunzwe cyane mu Rwanda no mu mahanga yageze muri iki gihugu ku wa Kane, yakirwa n’abakunzi be ndetse n’abateguye iki gitaramo, mu gihe imyiteguro yacyo iri ku musozo. Amashusho yakwirakwiye ku mbuga nkoranyambaga yagaragaje Mbonyi ageze ku kibuga cy’indege ari mu byishimo, ibintu byatumye abakunzi be bo mu Burayi barushaho gukumbura kumubona ku rubyiniro.
Iki gitaramo kiri mu rugendo rw’ibitaramo Mpuzamahanga Mbonyi amaze igihe akorera mu bihugu bitandukanye, aho agenda asakaza ubutumwa bwiza binyuze mu ndirimbo ze zakunzwe zirimo Nina Siri, Ku Musaraba, No Doubt na Yaratwimanye. Mu myaka ishize, uyu muhanzi yakoreye ibitaramo byitabiriwe n’imbaga mu bihugu birimo Canada, Leta Zunze Ubumwe za Amerika, u Bwongereza, Afurika y’Epfo n’ahandi, ibintu byamugize umwe mu bahanzi ba Gospel b’Abanyarwanda bafite izina rikomeye ku rwego mpuzamahanga.
Abanyarwanda batuye mu Bubiligi no mu bindi bihugu byo ku Mugabane w’u Burayi bamaze iminsi bagaragaza amatsiko menshi kuri iki gitaramo, aho biteganyijwe ko kizahuza abantu baturutse mu bihugu bitandukanye. Abateguye iki gitaramo bavuga ko imyanya myinshi yamaze gufatwa kare, bigaragaza uburyo Mbonyi akomeje gukundwa n’abakunzi b’umuziki wa Gospel. Mu gihe hasigaye amasaha make ngo igitaramo kibe, benshi bakomeje gutegereza kureba niba kizandika andi mateka nk’ay’ibindi bitaramo bikomeye uyu muhanzi amaze gukorera hanze y’u Rwanda.
