Umunyezamu Kimenyi Yves yagaragaje impungenge afite ku buryo amakipe menshi yo mu Rwanda acunga abakinnyi bayo, avuga ko hari ikibazo gikomeye cyo kudaha agaciro abakinnyi bamaze kumenyera uburyo ikipe ikinamo. Mu butumwa yashyize kuri Instagram kuri uyu wa Gatatu, yavuze ko bitumvikana uburyo amakipe arekura abakinnyi bamaze gusobanukirwa sisiteme y’ikipe, ahubwo agahitamo gushora amafaranga mu gushaka abandi bashya bagomba kongera gutangirira ku ntangiriro
Kimenyi yavuze ko ibi bituma amakipe ahora mu rwego rwo kubaka no kongera kubaka, aho kugira ngo yubakire ku byo yagezeho. Yagaragaje ko mu bihugu bifite umupira wateye imbere usanga amakipe agumana urufatiro rw’abakinnyi bayo imyaka myinshi, akongeramo bake bakenewe kugira ngo arusheho gukomera. Yibajije impamvu mu Rwanda amakipe amwe n’amwe agura abakinnyi barenga 10 buri mwaka, ibintu avuga ko bishobora kuba biri mu bituma umupira nyarwanda udatera intambwe ikomeye nk’uko benshi babyifuza.
Aya magambo ya Kimenyi yahise atangira kugibwaho impaka n’abakunzi b’umupira w’amaguru, bamwe bemeranya na we bavuga ko kubura gahunda y’igihe kirekire biri mu bibazo byugarije amakipe menshi yo mu Rwanda. Abandi bo bavuga ko hari igihe amakipe aba afite impamvu zirimo ubushobozi buke cyangwa amasezerano arangira, bigatuma ahindura abakinnyi benshi. Icyakora, ibitekerezo bya Kimenyi byongeye kuzamura ikiganiro ku cyakorwa kugira ngo amakipe yo mu Rwanda yubake umusingi ukomeye watuma arushaho guhatana haba imbere mu gihugu no ku rwego mpuzamahanga.
