Cristiano Ronaldo uri mu bambere muri ruhago, yatwaye Igikombe cya Shampiyona ya Arabie Saoudite muri uyu mwaka w`imikino wa 2025/2026 ku nshuro ya mbere kuva yagera muri Al Nassri, acyongera ku bindi bikombe asanzwe afite.
Cristiano Ronaldo yageze muri Al Nassr yo muri Saudi Pro League muri 2022, aho yari aje kuyikinira ndetse no kuyihesha igikombe cy’iyi shampiyona baherukaga mu mwaka wa 2018/19.
Ntabwo byamukundiye ko acyegukana akihagera, ndetse akenshi yerekanaga ko iyi shampiyona ikomeye kurusha aho yari yaranyuze haba i Burayi, mu Bwongereza ndetse no muri Espagne. Igikombe yatwaye cyari icya Arab Club Champions Cup yatwaye mu 2023.
Tariki ya 21 Gicurasi 2026, Nibwo yabigeze ho akuraho amateka mabi ubwo bakinaga na Damac bakayitsinda ibitego 4-1, mu mukino w’Umunsi 34 wa shampiona ya Saudi Pro League.
Sadio Mane ni we watsinze igitego cya mbere cyagiyemo ku munota wa 33, Kingsley Coman atsinda ikindi ku munota wa 51, na bibiri bya kizigenza Cristiano ku munota wa 62 ndetse n’uwa 80.
Nyuma yo gutsinda uyu mukino yahise igira amanota 86, irusha amanota abiri Al Hilal SC bihanganye, nubwo na yo yatsinze Al Feiha igitego 1-0, ihita yegukana Igikombe cya 10 cya Shampiyona ya Arabie Saoudite. Ibi bikombe yagiye ibyegukana muri 1975, 1980, 1981, 1989, 1994, 1995, 2014, 2015, 2019 na 2026.
Iyi kipe irangije uyu umwaka w imikino wa 2025/2026 itsinze imikino 28, inganya ibiri indi ine irayitsindwa. Cristiano Ronaldo yatsinze ibitego 28 muri 63 iyi kipe yatsinze muri uyu mwaka wimikino.
Uyu mukinnyi yahise agira ibitego 973, mu gihe akomeje urugendo rwe rwo kwandika amateka yo gutsinda ibitego 1000. Muri iyi shampiyona y`abarabu amaze gutsinda ibitego 102, mu gihe Al Nassr yayitsindiye ibitego 129.
Ku myaka afite 41 uyu Cristiano aherutse guhamagarwa mu Ikipe y’Igihugu ya Portugal izakina Igikombe cy’Isi cya 2026, kikazaba ari icya gatandatu uyu mugabo akinnye kuva yatangira gukina umupira w`amaguru.
Cristiano Ronaldo afite Ballon D’Or 5, yatwaye shampiyona eshanu z’aho yakinnye hose mu mupira w’amaguru harimo iya Espagne inshuro ebyiri ari kumwe na Real Madrid, iyo mu Bwongereza inshuro eshatu ari kumwe na Manchester United ndetse niyo mu Butaliyani inshuro ebyiri ari kumwe nikipe ya Juventus.
