Kiyovu Sports yongeye kugarura icyizere mu bafana bayo nyuma y’imikino itatu idatsinda, itsinda Gorilla FC igitego 0–1 mu mukino ukomeye wabereye kuri Stade pele (Kigali i Nyamirambo) . Ni intsinzi ifatwa nk’intsinzi y’agaciro kanini kuko ije mu gihe abanya-Kiyovu bari batangiye kugira impungenge ku musaruro w’ikipe yabo mu mikino iheruka.
Umukino watangiye utuje kumpande zombi bose batinze kwinjira mumukino, ikipe ya Gorilla igaragaza imbaraga nyinshi mu kugarira no kugerageza guca amarenga ko ishobora guhangana no gutsinda. Kiyovu Sports yo yagiye itangira buhoro buhoro gushyira umukino mu murongo wayo, yubaka uburyo bwo guhererekanya umupira neza no gushaka inzira zanyura mu bwugarizi bwa Gorilla bwari bwubatse.
Icyakora, Kiyovu Sports yagumanye icyizere kugeza ibonye uburyo bw’igitego cyahinduye umukino. Ku munota wa 45+2, Bayo Sherif yinjije igitego cyiza cyaturutse ku buryo bwateguwe neza n’ubusatirizi bw’iyi kipe. Ni igitego cyazamuye ibyishimo mu bafana ba Kiyovu bari bahagaze umutima, kigaragaza ko ikipe ifite ubushobozi bwo kugaruka no guhangana.
Mu gice cya kabiri, Gorilla FC yagerageje gushaka uko yishyura, ariko Kiyovu Sports ikomeza gukina yitonda, ikarinda igitego kimwe yari ifite. Myugariro n’umunyezamu wa Kiyovu bagize uruhare runini mu gutsinda uyu mukino, kuko bahagaritse ibitero byose byashoboraga guhindura isura y’umukino.
Ku mukino wose, Kiyovu Sports yerekanye ko ishobora kongera kubaka icyizere no guhagarara neza muri shampiyona, bikomeza kwibaza niba koko “Irakomerezaho?” nk’uko abafana babyiteguye. Iyi ntsinzi ibaha imbaraga n’icyizere cyo gukomeza urugamba.
