Kigali, Ku wa 25 Ugushyingo 2025 — Urwego rw’Igihugu rw’Imiyoborere (RGB) rwatangaje ko rwashyizeho Komite y’Inzibacyuho muri Rayon Sports, nyuma yo gusesengura ibibazo bikomeye byagiye bigaragara mu miyoborere y’uyu muryango ndetse bikaba byaragize ingaruka ku mikorere n’iterambere ryawo, cyane cyane mu rwego rwa siporo mu Rwanda.
Nk’uko biteganywa n’itegeko N°56/2016 rishyiraho RGB, n’itegeko N°058/2024 rigenga imiryango nyarwanda itari iya Leta, RGB ivuga ko yakoze igenzura ryimbitse ku miyoborere ya Rayon Sports, rigaragaza ibibazo by’imiyoborere bitandukanye byasabaga gukosorwa mu buryo bwihuse kandi burambye.
Nyuma y’iri genzura, RGB yafashe icyemezo cyo guhagarika inzego zose zari ziyoboye umuryango wa Rayon Sports, zirimo:Inama y’Ubutegetsi,Komite Nyobozi,Komite Ngenzuzi,n’Akanama gashinzwe gukemura amakimbirane.
Iki cyemezo cyatanzwe hagamijwe kunoza imiyoborere no kubungabunga inyungu z’abanyamuryango n’abakunzi b’iyi kipe.Imirimo yahawe Komite y’Inzibacyuho
Komite nshya yahawe inshingano zo:Gusesengura no kuvugurura amategeko shingiro y’Umuryango wa Rayon Sports;Gusesengura no kuvugurura inzego z’imiyoborere kugira ngo zijyane n’inshingano zazo;Gukora igenzura (external audit) ry’imari n’imikorere y’umuryango;Gusesengura ubusugire n’ubusugi bw’umuryango;No gukurikirana ibikorwa byose by’umuryango mu gihe cy’amezi atatu.
Abagize Komite y’Inzibacyuho,RGB yatangaje ko Komite igizwe n’aba bakurikira:
- Murenzi Abdallah – Ukuriye Komite y’Inzibacyuho
- Jean Bosco Nbumwe
- Madame Josee Akayezu
- Gakwaya Olivier
- Nsabimana Batiste
RGB ivuga ko izakomeza gukurikirana ishyirwa mu bikorwa ry’izi mpinduka mu buryo bwimbitse, hagamijwe kubaka umuryango unoze, ukorera mu mucyo, kandi ujyanye n’amatageko n’amahame y’imiyoborere myiza.
Mu itangazo, RGB yasobanuye ko izi ngamba zigamije gukemura ibibazo by’imiyoborere bimaze igihe bivugwa muri Rayon Sports, no gusubizaho ituze n’icyizere mu mikorere y’uyu muryango ukomeye mu mupira w’amaguru mu Rwanda.
