Umunyabigwi w’umupira w’amaguru Thierry Henry yongeye guhabwa icyubahiro gikomeye muri Leta Zunze Ubumwe za Amerika nyuma y’uko umwe mu mihanda yo mu Mujyi wa New York wamwitiriwe ku mugaragaro. Iki gikorwa cyabaye ku wa 10 Kamena 2026, kigamije guha agaciro uruhare rukomeye uyu Munyafaransa yagize mu iterambere rya ruhago muri uyu mujyi ndetse no muri shampiyona ya Major League Soccer (MLS). Nubwo Henry atabashije kwitabira umuhango wo gutaha uyu muhanda, iki cyemezo cyakiriwe neza n’abakunzi b’umupira w’amaguru hirya no hino ku Isi.
Abinyujije ku mbuga nkoranyambaga ze, Thierry Henry yavuze ko yishimiye cyane iki cyubahiro, ashimira abayobozi n’abatekereje kuri iki gikorwa. Yavuze ko New York izahora ifite umwanya wihariye mu buzima bwe, atari gusa kubera imyaka yamaze akinira New York Red Bulls, ahubwo no kuba ari ho umuhungu we Tristan yavukiye. Henry yibukije ko uyu mujyi wamuhaye ibihe byinshi byiza mu rugendo rwe rwa ruhago ndetse ukaba waramufashije gusoza neza umwuga we nk’umukinnyi wabigize umwuga.
Thierry Henry yasoje gukina umupira mu mwaka wa 2014 ari umukinnyi wa New York Red Bulls, nyuma y’urugendo rw’amateka rwamuranze mu makipe akomeye arimo Arsenal, Barcelona na Juventus. Kuba yitiriwe umuhanda muri New York byamushyize mu mubare w’ibyamamare bya ruhago byahawe iki cyubahiro muri uyu mujyi, aho na Pelé wahoze ari icyamamare cya ruhago ku Isi afite umuhanda witiriwe izina rye. Iki gikorwa cyongeye kwerekana uburyo Henry akomeje kubahwa no kwibukwa nk’umwe mu bakinnyi bakomeye babayeho mu mateka y’umupira w’amaguru.
