Nyampinga w’u Rwanda wa 2016, Mutesi Jolly, yatangaje ko agiye gutanga ikirego mu nkiko za Uganda arega umuhanzi w’icyamamare Moses Ssali uzwi nka Bebe Cool, nyuma y’amagambo yavuze ku mbuga nkoranyambaga yamuhuza n’uburiganya bwakorewe bamwe mu bantu bifashishije izina rye. Iki cyemezo cyatangajwe binyuze muri sosiyete yunganira abantu mu mategeko ya Mbidde & Co Advocates, ivuga ko umukiliya wayo yahisemo gushaka ubutabera nyuma y’uko izina rye rikomeje kuvugwa mu buryo bushobora kumwangiriza isura n’icyizere yari yarubakiye mu ruhame. Iyi nkuru yahise ikurura ibitekerezo byinshi mu Rwanda no muri Uganda, aho benshi bakomeje gukurikiranira hafi uko uru rubanza rushobora kuzagenda.
Mu ibaruwa yashyizwe hanze kuri uyu wa Gatatu, abanyamategeko ba Jolly bagaragaje ko Bebe Cool yirengagije amakuru yari asanzwe aboneka agaragaza ko umuntu wakoresheje izina rya Mutesi Jolly mu bikorwa by’uburiganya atari we. Bavuze ko nimero ya telefone yakoreshejwe muri ibyo bikorwa ibaruye ku muntu witwa Tumwine Daniel, bityo ko nta shingiro ryari rihari ryo gukomeza guhuza Jolly n’ibyo bikorwa. Bongeyeho ko amagambo yatangajwe na Bebe Cool ashobora kuba yaragize ingaruka ku cyubahiro cye ndetse no ku bikorwa bye by’umwuga, ari na byo byatumye hafatwa icyemezo cyo gushaka ubutabera mu nzira zemewe n’amategeko
.
Abanyamategeko ba Jolly banibukije ko mu Ukwakira 2024 yashyize hanze itangazo riburira abantu ku batekamutwe bakoreshaga amazina n’amafoto ye bagamije kwambura abantu amafaranga. Muri iryo tangazo, yasabye abamukurikira kwitondera umuntu uwo ari we wese washoboraga kubiyitirira ku mbuga nkoranyambaga cyangwa mu butumwa bwa telefone. Kuri ubu, amaso ya benshi ari ku cyemezo Bebe Cool ashobora gufata nyuma y’iyi baruwa ndetse n’intambwe z’amategeko zishobora gukurikiraho. Niba uru rubanza rujyanywe mu nkiko, rushobora kuba kimwe mu bibazo byavuzwe cyane mu myidagaduro yo mu karere ka Afurika y’Iburasirazuba muri uyu mwaka.
