Umunyarwenya akaba n’umunyamakuru Rusine Patrick yagaragaje amarangamutima akomeye ndetse n’ishimwe afitiye Nkusi Arthur, umwe mu bantu avuga ko bagize uruhare rukomeye mu ntangiriro z’urugendo rwe muri Stand-up Comedy. Mu butumwa yashyize ku rukuta rwe rwa Instagram, Rusine yavuze ko mu gihe yitegura kwizihiza imyaka 10 amaze akora urwenya rwo ku rubyiniro, yabonye ari ngombwa gusubiza amaso inyuma akibuka abantu bamubaye hafi mu bihe yari agitangira.
Rusine yavuze ko Nkusi Arthur ari we wamuhaye amahirwe ya mbere yamufashije kwinjira mu ruganda rwa Comedy ndetse akamugirira icyizere mu gihe abantu benshi bari bataramenya impano ye. Yagaragaje ko Arthur yamufashije gutaramira abantu bwa mbere, gukora igitaramo cye cya mbere cya Comedy, kubona amafaranga ya mbere akura muri uyu mwuga ndetse no kubona akazi ke ka mbere kuri radio. Kuri Rusine, ibyo byose ntabwo ari ibintu ashobora kwibagirwa kuko ari byo byabaye umusingi w’urugendo rwamugejeje ku rwego agezeho uyu munsi.
Mu gusoza ubutumwa bwe, Rusine yashimiye Nkusi Arthur ku cyizere yamugiriye no ku mahirwe yamuhaye, avuga ko yabaye umwe mu bantu bahinduye ubuzima bwe mu buryo budasanzwe. Aya magambo yakiriwe neza n’abakunzi ba Comedy nyarwanda, benshi bagaragaza ko ari urugero rwiza rw’uburyo abantu bageze kure bakwiye guhora bibuka ababafashije mu ntangiriro. Mu gihe Rusine yitegura kwizihiza imyaka icumi amaze ku rubyiniro, benshi bemeza ko yamaze kuba umwe mu banyarwenya bafite izina rikomeye mu Rwanda no mu karere.
