I Budapest muri Hungary Ikipe ya Paris Saint-Germain (PSG) yegukanye igikombe cya UEFA Champions League cya 2025/26 nyuma yo gutsinda Ikipe ya Arsenal kuri penaliti 4-3, nyuma y’uko iminota 120 y’umukino yari yarangiye amakipe yombi anganya igitego 1-1. Uyu mukino wa nyuma wabereye kuri Stade ya Puskás Aréna i Budapest mu gihugu cya Hungary ku wa 30 Gicurasi 2026.
Arsenal yatangiye umukino iri ku muvuduko wo hejuru maze Kai Havertz atsinda igitego cya mbere hakiri kare. Iki gitego cyahaye icyizere abakunzi b’iyi kipe yo mu Bwongereza bari bamaze imyaka myinshi bashaka kubona ikipe yabo isubira kumukino wanyuma w’Igikombe cya champions League cyane ko batarashobora kugitwara.
Mu gice cya kabiri, PSG yakomeje gusatira ishaka igitego cyo kwishyura. Ku munota wa 65, Ousmane Dembélé yatsinze penaliti yishyura nyuma y’ikosa ryari rikorewe Khvicha Kvaratskhelia. Uyu mukino wakomeje ariko iminota 90 n’iy’inyongera irangira nta yindi kipe ibashije kubona igitego cy’intsinzi.
Nubwo Nuno Mendes yahushije penaliti imwe, bagenzi be Gonçalo Ramos, Désiré Doué, Achraf Hakimi na Beraldo batsinze neza izabo. Ku ruhande rwa Arsenal, bamwe mu bakinnyi bayo ntibabashije kwitwara neza, bituma PSG yegukana igikombe cya kabiri gikurikiranya muri iri rushanwa nubwo David raya yari yakoze uko ashoboye.
Champions League ya 2025/26 yari iya kabiri ikinwe mu buryo bushya bwa UEFA bw’amakipe 36 aho buri kipe yakinnye imikino umunani mu cyiciro cya mbere mbere y’uko hakinwa imikino yo gukuranwamo.Abasesenguzi b’umupira w’amaguru bavuga ko PSG ikomeje kwiyubaka nk’imwe mu makipe akomeye cyane ku mugabane w’u Burayi, mu gihe Arsenal nayo yagaragaje ko yagarutse ku rwego rwo guhatanira ibikombe bikomeye nyuma y’imyaka myinshi itagera ku mukino wa nyuma wa Champions League.
