Guverinoma ya Uganda yatangaje ingamba nshya zikomeye zigamije gukumira ikwirakwira ry’icyorezo cya Ebola, zirimo guhagarika ingendo z’indege hagati y’iki gihugu na Democratic Republic of the Congo ndetse no kubuza ibiterane by’abantu benshi mu bice byo mu burengerazuba bw’igihugu.
Izi ngamba zatangajwe mu gihe ibihugu byo mu karere bikomeje kugira impungenge z’ikwirakwira rya Ebola nyuma y’uko hari abantu bagaragayeho iyi ndwara mu bice bimwe bya DR Congo.
Ingendo z’indege n’iz’amazi zahagaritswe
Abategetsi bashinzwe ubuzima muri Uganda batangaje ko ingendo z’indege hagati ya Uganda na DR Congo zahagaritswe by’agateganyo mu rwego rwo kugabanya ibyago byo kwandura no gukwirakwiza iyi virus yica.
Si ibyo gusa kandi, kuko hanahagaritswe ingendo zo mu mazi zinyura mu ruzi rwa Semliki River, ruherereye hagati y’ibihugu byombi kandi rusanzwe ari inzira y’ingenzi ikoreshwa mu gutwara ibicuruzwa no kwambutsa abantu.
Abasesenguzi bavuga ko uru ruzi rusanzwe rufite uruhare runini mu bucuruzi bwambukiranya imipaka, bityo guhagarika izi ngendo bishobora kugira ingaruka ku bikorwa by’ubucuruzi n’imibereho y’abaturage bo muri ako karere.
Ibiterane rusange byahagaritswe
Mu rwego rwo gukaza ubwirinzi, ubuyobozi bwafashe icyemezo cyo guhagarika ibikorwa byose bishobora guhuriza hamwe abantu benshi, cyane cyane mu turere two mu burengerazuba bwa Uganda.
Mu bikorwa byabujijwe harimo:
amasoko rusange,
ibiterane by’amadini,
ibikorwa by’imyidagaduro,
ndetse n’andi makoraniro ahuza abantu benshi.
Minisiteri y’Ubuzima ya Uganda yavuze ko izi ngamba ari iz’igihe gito kandi zigamije gukumira ikwirakwira rya Ebola , ishobora gukwirakwira vuba iyo abantu benshi bateraniye hamwe.
Gukaza igenzura ku mipaka
Leta ya Uganda yavuze kandi ko yashyize imbaraga nyinshi mu kugenzura abinjira n’abasohoka ku mipaka ihuza iki gihugu na DR Congo.
Abagenzi bose bari kugenzurwa ubushyuhe bw’umubiri ndetse hakorwa isuzuma ryihariye ku bantu bagaragaza ibimenyetso bishobora kuba bifitanye isano na Ebola.
Minisiteri y’Ubuzima yavuze ko kugeza ubu nta murwayi mushya wa Ebola uraboneka muri Uganda, kandi umuntu wari waranduye iyi ndwara yamaze kuvurwa ndetse isuzuma rya nyuma rikagaragaza ko atagifite virus mu mubiri.
Umuntu umwe yahitanywe na Ebola
Nubwo leta ivuga ko ibintu biri kugenzurwa neza, umuntu umwe yamaze guhitanwa na Ebola mu bitaro byo mu mujyi wa Kampala mu cyumweru gishize.
Urupfu rw’uwo murwayi rwateye impungenge abaturage ndetse rutuma inzego z’ubuzima zifata izi ngamba zikomeye zo gukaza ubwirinzi.
Impungenge mu karere
Ibihugu byo mu karere ka Afurika y’Iburasirazuba bikomeje gukurikirana hafi uko icyorezo cya Ebola gihagaze, cyane cyane ibihana imbibi na DR Congo aho iyi ndwara yagiye igaragara kenshi mu myaka yashize.
Inzobere mu buzima zisaba abaturage gukomeza kwitwararika, gukaraba intoki kenshi no kwihutira kujya kwa muganga igihe bagaragaje ibimenyetso birimo umuriro mwinshi, gucika intege cyangwa kuva amaraso bidasanzwe.
Guverinoma ya Uganda yavuze ko izakomeza gutanga amakuru ku gihe no gufata izindi ngamba igihe byaba bibaye ngombwa kugira ngo abaturage bakomeze kugira umutekano usesuye mu bijyanye n’ubuzima.
