Urukiko rw’Ubujurire rw’i Paris mu Bufaransa rwongeye gushinja amashirahamwe y’indege Air France na Airbus icyaha cyo “kwica abantu biturutse ku kutubahiriza amategeko y’umutekano”, mu rubanza rwerekeye impanuka y’indege AF447 yabaye mu mwaka wa 2009 igahitana abantu 228.
Iyo ndege yakoraga urugendo hagati y’umujyi wa Rio de Janeiro muri Brazil na Paris mu France, yaguye mu Nyanja ya Atlantique mu gihe yari ihuye n’umuyaga mwinshi n’ibihe bibi byo mu kirere.
Abantu bose bari muri iyo ndege, barimo abakozi 12 n’abagenzi 216, bahise bitaba Imana, bituma iyo mpanuka iba imwe mu zahitanye abantu benshi mu mateka y’ingendo zo mu kirere z’Ubufaransa.
Uko impanuka yabaye
Indege yo mu bwoko bwa Airbus A330 yaburiwe irengero kuri radar mu kwezi kwa Kamena 2009, nyuma yo guhura n’umuyaga ukomeye mu kirere cya Atlantique.
Raporo zakozwe nyuma zagaragaje ko hari ibice by’ingenzi by’indege byahagaritse gukora neza, bituma abapilote batakaza ubushobozi bwo kuyigenzura uko bikwiye mbere y’uko igwa mu nyanja.
Nyuma y’ibikorwa bikomeye byo gushakisha byakorewe ku buso bunini bwo munsi y’inyanja, ibisigazwa by’iyo ndege byaje kuboneka. Agasanduku kabika amakuru y’indege kazwi nka “black box” kabonetse mu mwaka wa 2011 nyuma y’amezi menshi gashakishwa.
Urubanza rwahindutse nyuma y’ubujurire
Mu mwaka wa 2023, urukiko rwo hasi rwari rwagize Air France na Airbus abere, ruvuga ko nta bimenyetso bihagije byerekana ko ari bo bateye iyo mpanuka.
Icyakora, nyuma y’ubujurire bwatanzwe n’imiryango y’ababuze ababo muri iyo mpanuka, Urukiko rw’Ubujurire rw’i Paris rwafashe icyemezo cyo kongera kubakurikirana ku cyaha cyo kutubahiriza amategeko y’umutekano ashobora kuba yaragize uruhare mu rupfu rw’abo bantu bose.
Ibi byazamuye impaka zikomeye mu rwego rw’ubwikorezi bwo mu kirere, cyane cyane ku bijyanye n’umutekano w’indege n’inshingano z’amasosiyete akora indege ndetse n’azitwara.
Impanuka itazibagirana mu mateka y’indege
Impuguke mu by’indege zivuga ko impanuka ya AF447 yabaye isomo rikomeye ku isi yose, kuko yagaragaje akamaro ko gukomeza kunoza ikoranabuhanga ry’indege ndetse no guhugura abapilote mu buryo bwo guhangana n’ibihe bikomeye byo mu kirere.
Kuva icyo gihe, hari impinduka nyinshi zakozwe mu rwego rw’umutekano w’indege, harimo uburyo bwo gukurikirana indege ziri mu rugendo ndetse n’imikorere y’ibikoresho bipima amakuru yo mu kirere.
Imiryango yabuze abayo muri iyo mpanuka yakomeje gusaba ubutabera no kumenya ukuri ku cyateye iryo sanganya, bavuga ko imyaka irenga 17 ishize itarabasubiriza kubijyanye n’agahinda batewe no kubura ababo.
