Kuri uyu mugoroba wo kuwa 09 Ukwakira 2025, i Bruxelles mu Bubiligi, Perezida wa Repubulika y’u Rwanda, Paul Kagame, yagiranye ibiganiro byihariye na Perezida wa Komisiyo y’u Burayi, Ursula von der Leyen, bigamije gushimangira ubufatanye hagati ya Rwanda n’Ubumwe bw’u Burayi (EU).
Ibiganiro byabo byibanze ku mikoranire isanzwe hagati y’impande zombi, cyane cyane ku bufasha bwa EU mu gushyigikira umushinga wo kubaka uruganda rwa BioNTech mRNA Vaccine Manufacturing Facility ruherereye i Kigali.
Nyuma y’ibiganiro byabo byihariye, Perezida Kagame na von der Leyen bahuriye kandi na Nadia Calviño, Perezida w’Ikigega cy’Iterambere cy’u Burayi (European Investment Bank – EIB), hamwe na Uğur Şahin, Umuyobozi Mukuru wa BioNTech. Iyi nama yabaye umwanya wo gutangiza inkunga nshya ingana na miliyoni 95 z’amayero (€95 million) izafasha guteza imbere ibikorwa byo gukora inkingo muri urwo ruganda.
Iyi nkunga nshya igamije gushimangira ubushobozi bwa Afurika mu gukora inkingo zayo bwite, bigabanya gukenera izituruka hanze, bityo ikazafasha mu guhangana n’indwara zinyuranye zirimo izandura nk’icyorezo cya COVID-19.
Perezida Kagame yakomeje kugaragaza ko uyu mushinga ari intambwe ikomeye mu rugendo rwo kubaka ubushobozi bwa Afurika mu bijyanye n’ubuvuzi n’ubushakashatsi, kandi ko ari urugero rwiza rw’ubufatanye bushingiye ku nyungu rusange hagati ya Afurika n’Ubumwe bw’u Burayi.
