Kuri uyu wa Gatanu tariki ya 12 Nzeri 2025, Polisi y’u Rwanda yatangaje ko yatangiye ibikorwa byo gushakisha abasore batatu bagaragaye mu mashusho bakubita bakanakomeretsa umukobwa mu murenge wa Nyarugenge, akagari ka Rwampara ku itariki ya 11 Nzeri 2025.
Amakuru agezweho yemeza ko umwe muri abo basore yamaze gufatwa, mu gihe abandi babiri bagishakishwa. Polisi ikomeje ibikorwa byayo byo kubahiga kugira ngo bose bashyikirizwe ubutabera.
Mugihe kandi umunyerondo wagerageje kubirukaho nawe yakomerekejwe, ariko kuri ubu ari kwitabwaho n’abaganga. Polisi y’u Rwanda yatangaje ko izakomeza gukurikirana iki kibazo kugeza igihe abagize uruhare bose bafashwe.
Mu itangazo yashyize ku mbuga nkoranyambaga, Polisi y’u Rwanda yagaragaje ko yamaze gufata neza iby’ayo mashusho, ndetse irimo gukora iperereza ryimbitse. Yongeye kwibutsa ko ibikorwa by’urugomo n’ihohoterwa ritandukanye bidakwiye mu muryango nyarwanda.
Nkuko bisanzwe Polisi ihora isaba abaturage gukomeza gutanga amakuru y’ahari icyaha cyangwa abakigizemo uruhare, kugira ngo ibihungabanya umutekano w’abaturage byose birangizwe. Yizeje ko izakomeza gufatanya n’abaturage mu kurwanya ihohoterwa iryo ari ryo ryose, hagamijwe kubaka igihugu gitekanye kandi kirangwa n’ubwubahane.
