Urwego rw’Ubugenzacyaha (RIB) ku bufatanye n’izindi nzego zirimo Polisi y’u Rwanda, Ikigo cy’Igihugu gishinzwe kugenzura Ibiribwa n’Imiti (Rwanda FDA), Ikigo cy’Igihugu gishinzwe Ubuziranenge (RSB), Ikigo gishinzwe Iterambere ry’Ubuhinzi n’Ubworozi (RICA) ndetse n’Umujyi wa Kigali, rweretse itangazamakuru ibicuruzwa bitujuje ubuziranenge bifite agaciro karenga miliyoni 106 Frw byafatiwe mu gikorwa cyiswe “Operasiyo USALAMA XI.”
Iyi Operasiyo ngarukamwaka yabaye kuva tariki ya 13 kugeza ku ya 17 Ukwakira 2025, bikaba byatangajwe Kuri uyu wa mbere,n’Umuvugizi wa Polisi y’u Rwanda ACP Boniface Rutikanga, Umuvugizi wa RIB Dr. Thierry Murangira, Uhagarariye Rwanda FDA Dr. Eric Nyirimigabo, ndetse n’Umuyobozi Mukuru ushinzwe Itumanaho n’Uburezi mu Mujyi wa Kigali Emma Claudine, bari gusobanurira itangazamakuru ibyavuye mu gikorwa cyiswe USALAMA XI-2025 cyo gufata ibicuruzwa bitujuje ubuziranenge n’ibyinjijwe mu gihugu mu buryo bunyuranije n’amategeko. igamije guhangana n’ibicuruzwa bihungabanya ubuzima bw’abaturage birimo ibyo kurya, kunywa, imiti, ndetse n’ibikoresho bikoreshwa mu buzima bwa buri munsi bitujuje ubuziranenge cyangwa bidafite inkomoko izwi.
Mu bikorwa by’igenzura byakozwe mu bice bitandukanye by’igihugu, abantu 72 bafashwe bakekwaho gukwirakwiza no gucuruza ibyo bicuruzwa, ndetse hafungwa inganda 4 n’amaduka 8 acuruza imiti (pharmacies) byagaragaye ko binyuranyije n’amategeko agenga ubucuruzi bw’ibiribwa n’imiti.
RIB yatangaje ko ibikorwa nk’ibi bizakomeza mu rwego rwo kurinda ubuzima bw’abaturage no gukumira ingaruka ziterwa n’ibicuruzwa bibi bikomeje kugaragara ku isoko. Yibukije kandi abacuruzi n’abaguzi kwitwararika, bakajya bagenzura neza ibicuruzwa bagura cyangwa bacuruza, bakareba niba bifite ibyemezo by’ubuziranenge biva mu nzego zibifitiye ububasha.
Ubutumwa bwa RIB burasobanura ko “abafashwe bazakurikiranwaho ibyaha byo gucuruza ibicuruzwa bitujuje ubuziranenge,” ndetse ikibutsa ko Operasiyo USALAMA izakomeza kugira uruhare rukomeye mu kurwanya ubucuruzi butemewe n’amategeko, no kubungabunga ubuzima n’umutekano rusange w’Abanyarwanda.
