Urwego rw’Igihugu rw’Ubugenzacyaha (RIB), ku bufatanye na Polisi y’u Rwanda, rwataye muri yombi Bucyanayandi Emmanuel, wiyitaga umuvugabutumwa, ukurikiranyweho gukoresha inyigisho z’ubuhanuzi mu buryo bw’uburiganya agamije kwambura abaturage amafaranga kubatari kumusobanukirwa niwe wagaragaye kumashusho avvuga ko nukora mmummufuka ibyo ukurammo yaba contake,ammafaranga imana iragukubira 5.
Uyu mugabo yagaragaye ku mbuga nkoranyambaga kandi atanga ubuhanuzi avuga ko ashobora kurinda abantu urupfu, indwara n’ibyago bitandukanye binyuze mu ituro ry’amafaranga. Byagiye bivugwa ko abashoboye gutanga ayo mafaranga yabizezaga ko bazahabwa imigisha myinshi ndetse ko ayo batanzemo azakubirwa inshuro eshanu.
RIB yatangaje ko Bucyanayandi afungiye kuri Station ya RIB ya Remera, mu gihe dosiye ye iri gutunganywa kugira ngo ishyikirizwe Ubushinjacyaha. Uru rwego ruvuga ko iki ari kimwe mu bikorwa bigamije kurinda abaturage ibikorwa byo kwamburwa hifashishijwe imyizerere.
Mu itangazo ryasohowe, RIB na Polisi basabye Abanyarwanda kudakurikira inyigisho z’ubuhanuzi zishingiye ku guhungabanya imitima y’abantu no kubambura ibyabo, kuko nta muntu ufite ububasha bwo guhindura ubuzima bw’undi akoresheje amafaranga. Basabye kandi abantu gukoresha umutima w’ubwitonzi no kwirinda kuba ibikoresho by’abashaka kubacucura bifashishije izina ry’Imana.
Abashinzwe umutekano bongeye kwibutsa ko umuntu wese uzafatwa yihisha mu buhanuzi agamije uburiganya azahanwa by’intangarugero, kuko ibi bikorwa bihungabanya abaturage kandi bikangiza isura y’amadini n’amatorero asanzwe yubahiriza amategeko.
Ibi bibaye mu gihe hirya no hino mu gihugu hakomeje kugaragara abantu biyitirira ubuhanuzi bakoresha imbuga nkoranyambaga mu gukusanya amafaranga, bamwe bagashyiraho ibiciro byo gusengerwa cyangwa guhabwa imigisha. Abasesenguzi bemeza ko hakenewe ubukangurambaga bukomeye bwo gusobanurira abaturage uburyo bwo gutandukanya ukwemera n’ubucuruzi buhishe inyuma y’ijambo ry’Imana.
