Polisi y’u Rwanda ku bufatanye n’Urwego rw’Igihugu rw’Ubugenzacyaha (RIB) yatangaje ko yatangije iperereza rigamije gukurikirana abacuruzi bagaragara mu mashusho acicikana ku mbuga nkoranyambaga bahindura uduvido twarimo Jus ya Salama, bamaze iminsi bahagaritse ku isoko n’inzego zibifitiye ububasha .
Amashusho yashyizwe hanze agaragaza abantu batandukanye barimo gusimbuza ibirango bya Salama Juice ku mavideyo, bakabomekaho ibirango bishya by’izindi nganda, mu rwego rwo kongera kubyinjiza ku isoko nk’ibicuruzwa bishya kandi. Polisi y’u Rwanda yavuze ko iki gikorwa ari icyaha cyo guhindura cyangwa gucuruza ibicuruzwa bihinduye isura n’inyandiko, mu buryo bushobora gushyira ubuzima bw’abaturage mu kaga gakomeye.
Umuvugizi wa Polisi y’u Rwanda, yaburiye abacuruzi n’abaguzi bose kwirinda ibikorwa nk’ibi by’uburiganya, ashimangira ko abagaragaye muri ayo mashusho bose bazabiryozwa bagahanwa. Yanongeyeho ko iperereza ryatangiye, kandi ababigiramo uruhare bose bazashyikirizwa ubutabera kugira ngo bahanwe hakurikijwe amategeko agenga ubucuruzi n’ubuziranenge bw’ibicuruzwa.
RIB na Polisi basabye abaturage kujya batanga amakuru aho babonye ibikorwa nk’ibi, bagafasha inzego z’umutekano mu kurinda ubuzima bw’abaturage bushobora kubigenderamo n’isura y’ubucuruzi bw’igihugu. Inzego zombi zanibukije ko guhindura ibirango cyangwa gupakira ibicuruzwa bihagaritswe ari icyaha gihanwa n’amategeko yo mu Rwanda, kandi gifatwa nk’ubwambuzi bushukana n’uburiganya mu bucuruzi.
Byateguwe na: MUCYO Felicien
