Perezida wa Repubulika y’u Rwanda, Paul Kagame, yageze mu mujyi wa Riyadh muri Arabia Saudite aho yatangiriye uruzinduko rwe rw’akazi agirana ibiganiro byihariye na Nyiricyubahiro, Igikomangoma Mohammed bin Salman, Umuyobozi Mukuru w’Igihugu cya Arabia Saudite. Uru ruzinduko ruje mbere y’itangizwa ku mugaragaro ry’Inama mpuzamahanga y’ishoramari izwi nka Future Investment Initiative (FII), igeze ku nshuro ya cyenda.
Mu biganiro byabaye hagati y’impande zombi, Perezida Kagame na Prince Mohammed bin Salman bagarutse ku mubano mwiza uri hagati y’u Rwanda na Arabia Saudite, banashimangira icyerekezo cy’ibihugu byombi cyo gukomeza kwagura ubufatanye mu nzego zinyuranye. By’umwihariko, ibiganiro byibanze ku guteza imbere ishoramari mu bikorwaremezo, ingufu zisubira, ubukerarugendo, n’ikoranabuhanga rigezweho nk’inkingi z’iterambere ry’igihe kirekire.
Perezida Kagame yashimye ubufatanye busanzweho, agaragaza ko u Rwanda rwiteguye kwakira abashoramari baturutse muri Arabia Saudite, mu gihe n’icyo gihugu cyagaragaje ubushake bwo gukorana n’u Rwanda mu buryo bwagutse.
Iyi nama ya Future Investment Initiative ifatwa nk’urubuga mpuzamahanga ruhuza abayobozi bakomeye b’ibihugu, abashoramari n’impuguke mu bukungu, hagamijwe gushakisha ibisubizo bishya mu iterambere ry’isi. Kuba Perezida Kagame ayitabiriye byongera kwerekana uruhare rw’u Rwanda mu biganiro by’isi birebana n’ishoramari, ubuhahirane n’iterambere rirambye.
