Ku wa 16 Nzeri 2025, mu karere ka Musanze, mu mirenge ya Muhoza na Mugo, hafashwe abantu babiri bakoraga inzoga zitujuje ubuziranenge bari barise “Muhe Nyina”.
Iyi nzoga bivugwa ko uyinyweye yahitaga agira ingaruka zitandukanye ku buzima zirimo kubyimba amatama, kubyimba ibirenge no kugira umunaniro. Abaturage bamwe bavuze ko umuntu wayinyweye yahitaga arambarara nk’uwatakaje imbaraga z’umubiri.
Umuvugizi wa Polisi mu karere ka Musanze yatangaje ko ibi byakozwe ku bufatanye n’abaturage ndetse n’inzego zibanze batanze amakuru ku gihe. Yahise anatangaza ko inzoga zose zafashwe zamenwe ndetse abari bazikora bafatwa.
Iyi nzoga “Muhe Nyina” ije ikurikira indi yigeze gufatwa mu minsi yashize yitwa “Ejo”, bigaragaza ko ubucuruzi bw’inzoga zitujuje ubuziranenge bugikomeje mu bice bitandukanye by’igihugu.
Abasesenguzi bavuga ko impamvu nyamukuru ituma izi nzoga z’inkorano zikomeza gukorwa ari uko zigurishwa ku giciro gito, bityo zikajya zishora mu buryo bwihuse mu baturage bafite ubushobozi buke. Banavuga ko ikibazo gikomeye ari uko inzoga nk’izi zikozwe mu buryo butizewe bishobora guteza ingaruka z’igihe gito n’iz’igihe kirekire ku buzima, zirimo indwara z’umwijima, impyiko, ndetse no guhuma. Bongeraho ko hakenewe ubukangurambaga buhoraho bwo gusobanurira abaturage ingaruka mbi z’izi nzoga, ndetse n’ibihano bikomeye ku bazikora no ku bazicuruza.
Polisi yasabye abaturage gukomeza gutanga amakuru y’ahakorera bene izi nzoga kugira ngo ubuzima bw’abantu burindwe.
