Mu gitondo cyo ku wa 8 Ukwakira 2025, Polisi y’u Rwanda ikorera mu Karere ka Kicukiro ifatanyije n’izindi nzego z’umutekano yakoze operasiyo yihariye mu Murenge wa Masaka, Akagari ka Rusheshe, Umudugudu wa Kanyetabi, ihafatira abagabo bane bari bamaze igihe bashakishwa kubera ibikorwa by’ubujura bikomeje guhangayikisha abaturage.
Amakuru aturuka mu nzego z’umutekano avuga ko aba bagabo bakunze gutegera abaturage mu nzira bakabambura ibyabo, ndetse no kwinjira mu nzu z’abantu nijoro bakiba ibikoresho bitandukanye n’amatungo. Ibi bikorwa byabo byari bimaze igihe bivugwa n’abaturage, bituma hafatwa icyemezo cyo gukora operasiyo ihuriweho n’inzego z’umutekano n’abaturage.
Umuvugizi wa Polisi y’u Rwanda mu Mujyi wa Kigali, Chief Inspector of Police (CIP) Gahonzire, yatangaje ko abafashwe bari mu bantu bashakishwaga kubera ibikorwa by’ubujura bihungabanya ituze ry’abaturage. Yashimiye abaturage bagize uruhare mu gutanga amakuru yatumye aba bantu bafatwa.
Yagize ati: “Turashimira abaturage bakomeje kudufasha batanga amakuru ku gihe. Ibi bituma dushobora gukumira ibyaha no gufata abakekwaho kubikora. Abibwira ko bazatungwa n’ibyo bibye, turabibutsa ko nta bwihisho bazabona muri iki gihugu.”
Aba bagabo bane bafashwe bahise bashyikirizwa Sitasiyo ya Polisi ya Masaka kugira ngo iperereza rikomeze kubyaha bakekwaho. Inzego z’umutekano zatangaje ko operasiyo igamije kugarura ituze n’umutekano w’abaturage itararangira ikomeje, kandi ko n’abandi bakekwaho kuba bafatanyije na bo muribyo bikorwa by’ubujura barimo gushakishwa.
