Urwego rw’Ubugenzacyaha (RIB) ku bufatanye na Polisi y’u Rwanda rwataye muri yombi Ndindabahizi Faustin uri mumyaka isaga 62, ukekwaho kugira uruhare muri Jenoside yakorewe Abatutsi mu 1994, aho yari amaze imyaka 31 yihisha hisha ubutabera.
Uyu mugabo yafatiwe ku biro by’Akagari ka Rubengera, mu Murenge wa Rubengera wo mu Karere ka Karongi, ubwo yari aje gusaba serivisi zisanzwe z’ubutaka, ari na bwo habaye uburyo bwo kumutahura hatanzwe amakuru y’uko akekwaho ibyaha bya Jenoside.
Amakuru atangwa n’inzego z’umutekano agaragaza ko Ndindabahizi yari amaze igihe kinini yaragiye ahindura imyirondoro n’aho atuye mu rwego rwo guhunga ubutabera. Ku bufatanye bw’abaturage n’inzego z’ibanze, amakuru yatanzwe yatumye afatwa nta gahato.
Inzego z’umutekano zikangurira abaturage gukomeza gutanga amakuru ku bantu bacyekwaho uruhare muri Jenoside bakidegembya, kugira ngo ubutabera bukomeze gutangwa. Ndindabahizi yashyikirijwe Urwego rw’Ubugenzacyaha gukurikiranwa mu mategeko, mu gihe dosiye ye igiye gutangira gutunganywa hagendewe ku bimenyetso n’amakuru akomeje gukusanywa.
