Perezida wa Repubulika y’u Rwanda, Paul Kagame, ari ku rutonde rwa bamwe mubakuru b’ibihugu bazitabira Inama ya Transform Africa Summit 2025, iteganyijwe kubera mu Mujyi umwe wa Conakry muri Guinée, ku matariki ya 12–14 Ugushyingo 2025. Iyi nama ikomatanyiriza hamwe abakuru b’ibihugu, impuguke mu ikoranabuhanga, inzego z’abikorera n’abashakashatsi, hagamijwe kurebera hamwe uko umugabane dutuye wa Afurika wagira uruhare rugaragara mu miterere y’ejo hazaza ishingiye ku bwenge bw’ubukorano (Artificial Intelligence, AI). Kuri iyi nshuro, igihugu cya Guinée cyihaye inshingano zo kwakira iyi nama, mu gihe Afurika ikomeje gutekereza ku buryo yatangiza politiki zihamye mu gucunga, gukoresha no kubyaza umusaruro ubuhanga bwa AI mu nzego zitandukanye. Ni ibihe bidasanzwe ku mugabane ukigaragaza icyuho mu bijyanye n’ubushobozi bwa tekinike, umutekano w’amakuru (data security) n’iterambere ry’ibikoresho bigezweho.
Perezida Kagame, ukunze kwitabazwaho mu biganiro bijyanye n’ikoranabuhanga kubera uko u Rwanda rugaragaza urugero rwiza mu mishinga ya dijitali, ategerejwe ho kuvuga ku ruhare rwa politiki igenzura neza ikoreshwa ry’ikoranabuhanga, binyuze mu kubaka ibikorwa remezo bifite umutekano n’ubwishingizi bw’amakuru y’abaturage. Biteganyijwe ko azanasangiza abandi bayobozi ubunararibonye bw’u Rwanda mu kubaka serivisi za Leta zihuzwa n’ikoranabuhanga uko bigenda.
Transform Africa Summit 2025 yiyemeje gutanga icyerekezo gishya ku migabane y’uburezi n’ubushakashatsi busabwa mu mategeko nimikorere ijyanye na AI, harebwa uko ibihugu bishobora gutegurira urubyiruko amasomo y’ejo hazaza ,cyane cyane mu bijyanye n’isuzuma rishingiye ku makuru menshi (big data analysis), ubuhanga bwo gukora porogaramu, n’ubushakashatsi mu ikoranabuhanga.
Abashoramari mpuzamahanga bazayijyamo bazagaragaza imishinga mishya ihuriweho na Afurika, irimo iy’ubuhinzi bwifashisha AI mu guhuza amakuru y’ikirere n’umusaruro, serivisi z’ubuzima zifashisha ibikoresho by’ikoranabuhanga mu gusuzuma indwara no kugabanya urujya n’uruza ku bitaro, kimwe n’uburyo bwo kubungabunga umutekano w’amakuru ku rwego rw’ikigo n’igihugu.
Uretse imibereho myiza y’abaturage, umutekano w’imbere mu bihugu ni indi ngingo izaganirwaho, kuko hari ibihugu biri guhangayikishwa n’uruhererekane rw’ibitero byo ku ikoranabuhanga (cyber-attacks). Inzobere zizatanga inama ku buryo bwo kubaka amashami yihariye y’ubugenzacyaha bushingiye ku ikoranabuhanga, n’amategeko ahana ikoreshwa nabi rya AI.
Abasesenguzi bemeza ko iyi nama idasanzwe izatangiza ishyirwaho ry’amasezerano mashya yo guhuriza hamwe imbaraga, harimo ubufatanye bwo guhugura abanyeshuri, abatekinisiye n’abashakashatsi b’ibihugu byagiye bisigaye inyuma bikagera ku rwego mpuzamahanga. Hazashyirwaho umuyoboro wo gukurikirana aho iterambere rigeze ndetse n’imbogamizi zigaragara.
Abakurikiranira hafi politiki ya Afurika mu ikoranabuhanga bavuga ko ibihugu byizeye politiki idahungabana bishobora kungukira byinshi mu ishyirwa mu bikorwa rya SIS (Smart Infrastructure Systems), bigafasha mu kubaka imijyi y’ejo hazaza, nimu gihe kandi isi iri kwinjira mu ikoranabuhanga rya 5G, robotiki n’ubwenge bw’ubukorano bufite ubushobozi bwo kwifatira imyanzuro, iyi nama izaba urubuga rwo gushyiraho umurongo uhamye wo kurinda ko Afurika iva ku murongo w’iterambere ry’isi.
Kubera ko u Rwanda ruri mu bihugu byerekanye icyerekezo cyagutse muri politiki za dijitali, amaso menshi azaba areba ibyo Perezida Kagame azasaba no gusaba ko hashyirwaho ubufatanye burambye n’ibigo bitanga amafaranga yo guteza imbere imishinga ya AI.
Transform Africa Summit 2025 itegerejweho gutanga umusaruro ufatika mu gihe cy’imyaka isaga itanu iri imbere, ikanatanga icyerekezo gishya cy’uko Afurika ishobora guharanira ubusugire bwayo mu bijyanye n’ubumenyi, umutekano w’ikoranabuhanga n’iterambere rishingiye ku makuru afatika.
