Mu Karere ka Gicumbi, Umurenge wa Mutete, Akagari ka Gaseke, Umudugudu wa Nyamiryango, haravugwa inkuru ibabaje y’umwana n’umubyeyi we batwitswe n’abantu bataramenyekana mu ijoro ryakeye.
Amakuru yemejwe n’ubuyobozi bw’Akarere ka Gicumbi dukesha umunyamakuru Sam Kabera avuga ko abo bantu bagabweho igitero n’abantu bataramenyekana bitwaje essence, bakabatekeraho umuriro. Nyuma y’icyo gikorwa cy’ubugome, umwana n’umubyeyi we bahise bajyanwa ku kigo nderabuzima cya Gaseke aho bari kuvurirwa ibikomere bikomeye batewe n’ayo mahano.
Meya w’Akarere ka Gicumbi, ubwo yavuganaga n’itangazamakuru kuri telefoni, yavuze ko amakuru bayamenye mu ijoro, kandi iperereza ryahise ritangira kugira ngo hamenyekane abakoze ubwo bugizi bwa nabi kuko ari igikorwa cy’ubunyamaswa. Yavuze ati: “Nibyo koko twabimenye nijoro, inzego z’umutekano zatangiye iperereza. Amakuru y’ibanze avuga ko uwo mugore yari asanzwe abana n’umugabo mu makimbirane, ariko ubu batari bakibana.”
Kugeza ubu inzego zishinzwe umutekano ziracyakora iperereza kugira ngo hamenyekane ababikoze n’impamvu yabyo. Abaturage bo muri ako gace basabye ko ubutabera bwihutira gukurikirana iki kibazo, kuko ibyabaye bibatera ubwoba n’agahinda ariko kandi ubuyobozi bubasaba gukomeza gutanga amakuru kuwagira icyo yamenya kubakoze ibyo.
