Mu Murenge wa Coko, Akagari ka Mbirima mu Karere ka Gakenke, haravugwa urupfu rw’umwana w’imyaka itandatu rukomeje kuzamura impungenge mu baturage n’inzego z’umutekano, nyuma y’uko bivugwa ko yaba yishwe na nyina amuziza gutanga amakuru kwibura ry’inkoko y’abaturanyi.
Byabaye mu ijoro ryo ku wa Mbere tariki ya 24 Ugushyingo 2025, ubwo uyu mwana yasanzwe mu rugo rwabo yapfuye, bikurikirwa no gufungwa kwa nyina ukekwaho kugira uruhare muri uru rupfu. Amakuru atangwa n’abaturanyi agaragaza ko mu gitondo cy’uwo munsi, ubwo bari mu mirimo yo gushakisha inkoko yari yaburiwe irengero, uyu mwana yavuze ko yayibonye mu rugo rwabo, ibintu byahise bica amarenga y’uko hashobora kuba hari icyo nyina azi kwibura ryayo.
Abaturanyi bavuga ko ubwo nyina yatahaga ku mugoroba, umwana yongeye gusubiramo ayo magambo, ariko nyina aramuhakanya avuga ko nta nkoko yari mu rugo rwabo. Bukeye abaturage batunguwe no guhamagarwa n’uyu mugore ababwira ko umwana we arembye. Uwagize uruhare mu gutabara yabwiye itangazamakuru ko basanze umwana yamaze gushiramo umwuka.
Uwo mugore ngo yahise atanga ibisobanuro ko umwana yamurembanye mu ijoro ndetse ko ari bwo yaje gushiramo umwuka. Gusa abaturage n’inzego zishinzwe umutekano batangaje ko ibisobanuro bye bikiri kugenzurwa, cyane ko hari mpaka zabaye mbere y’urupfu rw’umwana.
Kuri ubu, nyina yafashwe ari mu maboko y’inzego z’umutekano kugira ngo hakorwe iperereza ryimbitse rizagaragaza icyabaye n’uko umwana yishwe. Inzego z’ibanze zo mu Murenge wa Coko zatangaje ko zizakomeza gukurikirana iki kibazo no gufasha mu gucungira umutekano w’abaturage, cyane cyane ko ikibazo cy’icuruzwa n’ubujura bw’amatungo magufi gikomeje kugaragara muri ako gace.
