Umuyobozi w’Ishyirahamwe ry’Umupira w’Amaguru mu Rwanda (FERWAFA), aherutse gutangaza ko hari amahirwe menshi y’uko mu gihe cya shampiyona gitaha hazatangira gukoreshwa ikoranabuhanga ryo gusubiramo amashusho, rizwi nka VAR (Video Assistant Referee). Ni amakuru yakiranywe ibyishimo n’abakunzi b’umupira, cyane cyane abafana b’imikino yo mu gihugu,abatoza, ndetse namakipe bamaze igihe basaba ikoreshwa ry’ikoranabuhanga mu rwego rwo kugabanya amakosa y’abasifuzi badahwema kugaragaza.
Uyu mushinga wa VAR uzaba ushingiye ku bufatanye hagati ya FERWAFA, Minisiteri ya Siporo ndetse n’abafatanyabikorwa batandukanye, hagamijwe kunoza ireme ry’umukino no kongerera imbaraga ubunyamwuga mu gusifura. Ubuyobozi buvuga ko ibikoresho by’ingenzi byamaze gutumizwa ndetse hari n’Abanyarwanda bamaze koherezwa mu mahugurwa yo ku rwego mpuzamahanga kugira ngo bazafashe mu ishyirwa mu bikorwa ry’iki gikorwa.
VAR izifashishwa gukuraho ugushidikanya ku byemezo bikomeye byiganjemo ibitego bitavugwaho rumwe, penaliti, amakarita ndetse n’amakosa aba yabaye mbere y’igikorwa cyavuyemo igitego. Hari byinshi byagiye bitera impaka mu mupira w’u Rwanda haba mu cyiciro cya mbere no mu mikino ya shampiyona ku rwego rw’igihugu, bituma abakunzi b’imikino bifuza ko igihugu cyatera intambwe nk’iyi yikoranabuhanga .
Abatoza, abafana ndetse n’abakinnyi bavuga ko iri koranabuhanga rizazamura icyizere ku byemezo bifatwa ku bibuga, rikagabanya impaka n’amakimbirane asanzwe yarangaga shampiyona mu bihe byashize. Gusa ntihakurwaho ko hazaba imbogamizi mu ishyirwa mu bikorwa, zirimo ubushobozi bw’ikoranabuhanga, ibibuga bikwiye kuko mu Rwanda hagaragara ibibuga bitari byinsi byujuje ibisabwa kuba hakoreshwa iryo koranabuhanga nka Stade Amahoro, ndetse n’umutungo.
Nubwo bimeze bityo, FERWAFA itangaza ko intego ari uguteza imbere umupira mu gihugu no gutegura neza abakinnyi n’abasifuzi ku rwego mpuzamahanga. Abakunzi b’umupira bateze amaso ku marushanwa y’imikino y’umwaka utaha, bifuza kubona shampiyona igezweho, itarangwamo ugushidikanya ku byemezo by’abasifuzi, mu rwego rwo kongerera imbaraga fairness mu mukino. Ikoreshwa rya VAR nirishyirwa mu bikorwa uko bikwiye, rizaba intambwe ikomeye mu mateka y’umupira w’amaguru mu Rwanda, cyane ko rizazamura urwego rw’imikino n’icyizere cy’abitabira.
