Mu karere ka Kicukiro, umurenge wa Nyarugunga, haravugwa inkuru ibabaje y’umuryango wasohowe mu nzu ukabura aho werekeza. Uyu muryango ukaba wahise werekeza ku cyicaro gikuru cy’Itorero ry’Abaluteri mu Rwanda, ariko nyuma y’urupfu rw’umukuru wawo wari umaze imyaka igera kuri 21 akorera iri torero, ngo ntiwongeye gufashwa kugeza ubwo wasohowe mu nzu wari utuyemo.
Amakuru yemeza ko nyakwigendera yari yaritanze mu buryo bugaragara mu kazi k’itorero mu gihe cy’imyaka myinshi, ibintu byari byaratumye umuryango we wumva wizeye ubufasha igihe cyose wakenera inkunga. Nyamara, kuva yitaba Imana, ngo iri torero ntiryigeze rikomeza gufasha abasigaye, bigatuma basigara mu buzima bugoye. Bivugwa ko ibintu byageze aho kuba bibi, bikarangira n’inzu bari batuyemo basohowemo, bahise berekezanya ibikoresho byabo hanze y’icyicaro gikuru cy’itorero.
Umwe mu bagize umuryango yagize ati: “Papa wacu yakoze hano imyaka 21, ariko kuva yapfa ntitwigeze tubona ubufasha none Ubu nta hantu dufite ho kwerekeza badusohoye munzu.”
Abaturage bo mu gace ka Nyarugunga bagaragaje impungenge kuri iki kibazo, bavuga ko bibabaje kubona umuryango usohorwa mu nzu kandi wari usanzwe ushyigikira ibikorwa by’itorero. Bavuga ko byari bikwiye ko habaho ubushishozi no gushakirwa umuti w’iki kibazo hakiri kare, kugira ngo imiryango isigara idashyirwa mu byago byo gusigara ku muhanda.
Kugeza ubu, ubuyobozi bw’Itorero ry’Abaluteri ntacyo buratangaza ku mugaragaro kuri iyi nkuru. Ariko abaturage basaba ko hagira igikorwa cyihuse, haba mu rwego rwo gushakira uyu muryango ubufasha bw’ibanze, cyangwa se mu rwego rwo kwibuka no guha agaciro umurimo w’imyaka myinshi nyakwigendera yakoze mu rwego rw’itorero.
Ibi byabaye isomo rikomeye ku muryango nyarwanda n’amatorero atandukanye, ko kwita kubanyamuryango ari inshingano itagomba gusigara mu magambo, ahubwo igaherekezwa n’ibikorwa bifatika byo kubafasha kugira ngo bakomeze ubuzima.
