Ikoranabuhanga rishya rishobora guhindura isura y’imodoka ku Isi Muburyo Budasanzwe
Abashakashatsi bo mu kigo cya Nipsea Group batangaje ko bakoze irangi ridasanzwe ry’umukara rifite ubushobozi bwo gufata hafi urumuri rwose rurikubiseho, ku kigero cya 99.9%, ku buryo imodoka isizwe iri rangi ishobora kugaragara nk’ikintu cy’umwijima gusa, bigoye gutandukanya imiterere yacyo nyakuri.
Iri koranabuhanga rishya ryafashwe nk’intambwe ikomeye mu rwego rw’inganda zikora amarangi, cyane cyane mu rwego rw’imodoka, aho abakunda ibishushanyo bigezweho n’imiterere idasanzwe bashobora kubona uburyo bushya bwo guhindura isura y’ibinyabiziga byabo.
Kuki iri rangi ritandukanye n’andi?
Mu buryo busanzwe, iyo urumuri rukubise ku modoka, rugaruka mu maso y’umuntu akaba ari bwo ashobora kubona amabara yayo, inguni, imfuruka n’imiterere yayo yose.
Ariko kuri iri rangi rishya si ko bimeze.
Iyo urumuri rurikubiseho, hafi ya rwose ntirugaruka,Ahubwo rufatwa n’iryo rangi rugakomeza imbere muri rwo, bityo amaso y’umuntu ntabashe kubona neza aho imodoka itangirira cyangwa irangirira.
Ibi bituma imodoka isa nk’ikintu kirambuye cy’umukara gusa, kitagaragaza neza imirongo, imiterere cyangwa ibice biyigize.
Amabanga ari inyuma y’iri koranabuhanga
Abashakashatsi bavuga ko ibi babigezeho bakoresheje utuntu duto cyane twa carbone tudashobora kubonwa n’amaso y’umuntu.
Utwo tuntu twavanzwe mu buryo bwihariye ku buryo dufata urumuri rugakomeza hagati yatwo aho kurugarura hanze nk’uko bikorwa n’amarangi asanzwe.
Ni ikoranabuhanga rishingiye ku buryo urumuri rwitwara iyo ruhuye n’utwo tunyangingo duto cyane, bikarangira hafi ya rwose rubuze aho rwanyura ngo rugere ku maso y’ureba.
Rije gukemura ikibazo cyari cyarananiye Vantablack
Iri rangi rishya rije rikurikira irindi ryamamaye cyane ku Isi ryitwa Vantablack, ryigeze gukurura abantu benshi kubera ubushobozi bwo gufata urumuri ku rwego rwo hejuru.
Mu 2019, uruganda rwa BMW rwigeze kwerekana imodoka yo mu bwoko bwa X6 isize Vantablack, ibintu byatunguye benshi ku Isi.
Nubwo ryari ikoranabuhanga ridasanzwe, Vantablack ryagize ibibazo byinshi byatumye ridashobora gukoreshwa ku modoka zigenda buri munsi.
Mu bibazo byaryo harimo kwangirika vuba iyo rihuye n’izuba rikabije, amazi y’imvura cyangwa gukorwaho kenshi n’abantu.Ibyo byatumye ridahinduka irangi ryifashishwa ku rwego rw’ubucuruzi busanzwe.
Iri rangi rishobora gukoreshwa buri munsi
Nipsea Group ivuga ko irangi ryayo rishya ryakozwe mu buryo bukomeye kurushaho.
Rishobora guterwa ku modoka hakoreshejwe ibikoresho bisanzwe bikoreshwa mu gusiga amarangi, kandi rikaba ryakwihanganira izuba, imvura ndetse n’imikoreshereze ya buri munsi.
Ibi bivuze ko mu gihe iri koranabuhanga ryakwemerwa ku isoko, rishobora kuzakoreshwa ku modoka zisanzwe zigenda mu mihanda, ibintu bitigeze bishoboka ku yandi marangi y’umukara afata urumuri ku rwego rwo hejuru.
Ese rizahindura ejo hazaza h’inganda z’imodoka?
Nubwo iri rangi rigikomeje gukorerwaho ubushakashatsi no kunozwa, inzobere zivuga ko rishobora gufungura amahirwe mashya mu nganda z’imodoka, ubuhanzi, ubwubatsi ndetse no mu bikorwa bya gisirikare bisaba kugabanya uburyo ibintu bigaragarira amaso.
Ku bakunzi b’imodoka, iri rangi rishobora kuzaba kimwe mu bishya bizakurura amaso menshi mu myaka iri imbere, kuko ritanga isura idasanzwe ituma imodoka isa nk’iyanyuze mu mwijima mwinshi kurusha ibindi byose byari bimenyerewe kugeza ubu.
Mu gihe iri koranabuhanga rikomeje gutera imbere, birashoboka ko mu myaka iri imbere abantu bazatangira kubona imodoka zisa nk’izibura mu maso y’uzireba, nyamara zihari imbere ye.
#BMW