Umutoza w’Ikipe y’Igihugu y’u Buyapani, Hajime Moriyasu, yagaragaye akora ibintu bidasanzwe byakuruye amaso y’abakunzi ba ruhago mu mukino wa mbere w’Igikombe cy’Isi cya 2026 wahuje igihugu cye n’u Buholandi. Mu gihe umukino wari urimo ihangana rikomeye, Moriyasu yafashwe n’amakamera afite icyapa cyanditseho iminota yari isigaye kugira ngo abakinnyi be babashe gukina bazi neza igihe gisigaye mbere y’uko umukino urangira. Iki gikorwa cyavugishije benshi ku mbuga nkoranyambaga, aho bamwe bagifashe nk’uburyo bushya bwo gufasha abakinnyi gukomeza kwitwararika mu bihe bya nyuma by’umukino.
Uyu mukino warangiye amakipe yombi anganyije ibitego 2-2 nyuma y’iminota 90 yuzuyemo ishyaka n’ubwitange. U Buyapani bwagaragaje umukino mwiza ndetse bwerekana ko bushobora guhangana n’amakipe akomeye ku rwego rw’Isi. Mu bihe bya nyuma by’umukino ni bwo Moriyasu yatangiye kuzamura cya cyapa agaragariza abakinnyi be iminota isigaye, ibintu bamwe mu basesenguzi bavuze ko bishobora kuba byarafashije ikipe gukomeza kuba maso no kwirinda amakosa ashobora kuyibuza kubona umusaruro mwiza.
Hajime Moriyasu asanzwe azwi nk’umutoza ukunda gutegura neza amakipe ye no gukoresha uburyo bugezweho mu kuyatoza. Agashya yagaragaje muri uyu mukino kahise kaba imwe mu nkuru zavuzwe cyane nyuma y’uyu mukino, ndetse bamwe mu bafana bavuga ko gashobora no gukurikizwa n’abandi batoza mu marushanwa ari imbere. Nubwo u Buyapani butabashije kubona intsinzi, uburyo bwakinnye ndetse n’udushya twagaragajwe n’umutoza wabwo byatumye bukomeza kwibazwaho nk’imwe mu makipe ashobora gutungurana muri iri Gikombe cy’Isi cya 2026.
