Kigali, ku wa 8 Nzeri 2025 – Amahugurwa y’ubumenyi ku mutekano w’ikoranabuhanga (Cybersecurity) n’iterabwoba rikoreshwa ikoranabuhanga (Cyber Terrorism Awareness Workshop) yatangiye kuri uyu wa Mbere mu Mujyi wa Kigali, akaba ari kubera kuri Kigali Paramount Hotel, aho azamara iminsi itanu, kuva tariki ya 8 kugeza ku ya 12 Nzeri 2025.
Iri huriro ryateguwe ku bufatanye n’inzego zitandukanye zirimo Umuryango w’Ubumwe bw’u Burayi (EU) n’Umuryango wa Afurika yunze Ubumwe (AU), rikaba rigamije gufasha ibihugu by’Afurika kwiyubaka mu rwego rwo kurwanya no gukumira ibyaha bikorwa hifashishijwe ikoranabuhanga.
Nk’uko byatangajwe na Fabrice Rugumire, umwe mu bari gukurikiranira hafi imigendekere y’aya mahugurwa, yavuze ko intego ari ugutanga ubumenyi, gusangira ubunararibonye no kurebera hamwe ingamba zifatika zo kurinda imiyoboro y’itumanaho n’amakuru y’ibihugu. Ati: “Ni intangiriro y’icyumweru cy’ingenzi cyane ku rwego rwa Afurika mu guhangana n’ibibazo by’umutekano w’ikoranabuhanga no kurwanya iterabwoba rikomeje gufata indi ntera binyuze kuri murandasi. Tugomba gukomeza gutanga amakuru y’ingenzi n’ubushishozi buzafasha abitabiriye.”
Amafoto agaragara ku munsi wa mbere yerekana abitabiriye baturutse mu nzego za leta, inzego z’umutekano, ndetse n’abahagarariye imiryango itandukanye mpuzamahanga. Amahugurwa ari guhabwa mu buryo bw’imyigire y’amasomo, ibiganiro n’imyitozo yihariye igamije gufasha ibihugu gutegura ingamba zihamye zo gucunga neza umutekano w’ikoranabuhanga.
Umwe mu barimu batanze ikiganiro ku munsi wa mbere yasobanuye ko ibitero by’ikoranabuhanga (cyberattacks) n’iterabwoba rikorerwa kuri murandasi (cyber terrorism) byagiye byiyongera mu myaka ishize, bigahungabanya inzego z’ubukungu, umutekano ndetse n’imibereho y’abaturage. Yagize ati: “Nta gihugu cyihagije cyonyine mu guhangana n’iki kibazo, bisaba ubufatanye mpuzamahanga no gusangira amakuru hagati y’ibihugu byose.”
Amahugurwa azibanda ku ngingo zitandukanye zirimo uburyo bwo kurwanya iterabwoba rikoreshwa ikoranabuhanga, gukumira ubujura bw’amakuru, kongerera ubushobozi inzego z’umutekano no guteza imbere ubufatanye hagati y’ibihugu bya Afurika.
Biteganyijwe ko mu minsi ikurikira hazatangwa ibiganiro byimbitse ku ruhare rw’urubyiruko mu guhangana n’ibibazo by’umutekano w’ikoranabuhanga, gusigasira uburenganzira bwa muntu mu gihe cyo kurwanya iterabwoba, ndetse no guhuza ingamba za Afurika n’iza mpuzamahanga.
Aya mahugurwa yitezweho kongera ubushobozi no kuzamura ubumenyi bw’abayitabiriye, bikazagira uruhare rukomeye mu guhangana n’ibibazo bikomeje kwiyongera mu isi y’ikoranabuhanga igezweho.
