Ishyirahamwe ry’umupira w’amaguru ku Isi, FIFA, ryatangaje ivugururwa ry’ibihano byo ku isoko ry’igura n’igurisha (transfer ban), aho amakipe menshi yo ku mugabane wa Afurika yabujijwe kwandikisha abakinnyi bashya kubera amakimbirane ajyanye n’imyenda itarishyuwe.
Nk’uko bigaragara ku makuru yashyizwe hanze, aya makipe ari mu bihano kubera kutuzuza inshingano zo kwishyura amafaranga arebana n’abakinnyi cyangwa abandi bafatanyabikorwa , bityo FIFA igafata icyemezo cyo kuyahagarika by’agateganyo ku isoko ry’abakinnyi.
Mu makipe yashyizwe kuri uru rutonde harimo CR Belouizdad (Algeria), Zamalek SC (Misiri), Wiliete SC na Sagrada Esperança (Angola), AS Vita Club (DR Congo), Al Ahly Benghazi na Al Nasr (Libya), Africa Sports d’Abidjan (Côte d’Ivoire), Nkana FC (Zambia), TS Galaxy na Free State Stars (Afurika y’Epfo), Singida Black Stars na Kengold SC (Tanzania), Ngezi Platinum FC (Zimbabwe), TRA United SC (Tanzania), St George SC (Ethiopia), Al Falah Atbara (Sudan), ndetse na Vision FC yo mu Rwanda iri muri ayo makipe yabujijwe kwandikisha abakinnyi bashya.
FIFA yasobanuye ko nta mukinnyi mushya n’umwe wemerewe kwandikwa muri ayo makipe keretse igihe cyose imyenda yose izaba yamaze kwishyurwa no gukemurwa burundu. Ibi bihano bishobora kugira ingaruka zikomeye ku mikorere y’amakipe bireba, cyane cyane mu gihe cy’isoko ry’igura n’igurisha, aho amakipe aba ashaka kwiyubaka no kongera imbaraga mu makipe yayo.
Ku makipe yo muri Afurika, iyi myanzuro ya FIFA yongeye kugaragaza akamaro ko imiyoborere myiza y’imari, kubahiriza amasezerano no gukemura amakimbirane ku gihe, mu rwego rwo kwirinda ibihano bishobora kudindiza iterambere ry’imikino n’amarushanwa yo ku rwego rw’igihugu n’urw’akarere.
Abakunzi b’aya makipe barategereje kureba niba ubuyobozi bwabyo buzihutira gukemura ibibazo by’imyenda, kugira ngo ibihano bikurweho maze bikemererwe gusubira ku isoko ry’abakinnyi.
