Urwego rw’Igihugu rw’Ubugenzacyaha (RIB) rwatangaje ko rufunze abandi bantu babiri bakekwaho uruhare mu gukwirakwiza amashusho y’urukozasoni ya Yampano, amashusho akomeje guca ibintu ku mbuga nkoranyambaga no gutera impaka mu baturage. Aba batawe muri yombi ni Cyprien Uzabakiriho, uzwi nka Djihad, na Kwizera Nestor, wamamaye ku izina rya Pappy Nesta Nesta.
Umuvugizi wa RIB, Dr. Murangira B. Thierry, yemeje ayo makuru anasobanura ko ibikorwa by’iperereza bikomeje mu buryo buhoraho kugeza igihe buri wese wagize uruhare muri ibi bikorwa bitemewe azashyikirizwa ubutabera.
Iri jambo rya RIB ryongera kwerekana ko nta kwihangana ku byaha bijyanye no guhererekanya cyangwa gukwirakwiza ibijyanye n’urukozasoni, cyane cyane ibishobora gukomeretsa, guhungabanya cyangwa gutesha agaciro uwabikorewe.
Aba bombi bafashwe biyongereye ku bandi bari bamaze iminsi bakurikiranwa muri iyi dosiye barimo Kalisa John (Kjohn), Ishimwe Patrick (Pazzo Man) ndetse na Ishimwe François Xavier. Kugeza ubu, abamaze kugaragara muri iki kibazo bageze kuri batanu, kandi uyu mubare ushobora gukomeza kwiyongera bitewe n’uko iperereza ririmo gukorwa mu buryo burambuye.
Abaturage kandi barasabwa gutanga amakuru ku bantu bose bakekwaho kugira aho bahurira n’iyi dosiye, kugira ngo ubutabera bugere ku babigiramo uruhare.
Iki kibazo cyafashe indi ntera mu kuzirikana ubusugire bw’abandi ku mbuga nkoranyambaga. Kigaragaza ko igihe cyose umuntu ari mu gikorwa cyo gusakaza iby’abandi, haba hari ingaruka zikomeye ku burenganzira bw’ubuzima bwite bwabo, ndetse n’ingaruka z’amategeko .
