Mu mukino w’uyumunsi wa shampiyona wahuzaga Rayon Sports na AS Kigali kuri iki cyumweru, waranzwe n’umukino urimo imbaraga nyinshi n’ishyaka ku mpande zombi, ariko urangira AS Kigali yegukanye intsinzi yo hanze ku kibuga cya Rayon Sports yari yakiriye itsinze ibitego 2-0. Igitego cya mbere cyatsinzwe ku munota wa 70’ na Nshimiyimana Tharcisse, mu gihe icya kabiri cyabonetse ku munota wa 85’ cyatsinzwe na Dushimimana Olivier uzwi nka “Muzungu.”
Igice cya mbere cy’umukino cyarangiye amakipe yombi atabashije kubona igitego, nubwo Rayon Sports yari imbere mu gukina neza no kugerageza gushaka uburyo bwo gufungura amazamu ariko bikayigora . Abasore ba AS Kigali bo birinze gutanga icyuho, bakina batekanye kandi bicungira ku bibuga byombi, bategereza amahirwe yabo mu gice cya kabiri.
Rayon Sports yatangiye igice cya kabiri yongera umuvuduko, ariko AS Kigali iza kubihindura ku munota wa 70’ ubwo Nshimiyimana Tharcisse yarangizaga neza ku mupira wari uvuye mu gikosa cyari kibaye hagati, afungura amazamu.
Iki gitego cyahinduye icyerekezo cy’umukino, AS Kigali irushaho gukina yishimye mu gihe Rayon Sports yageragezaga uko ishoboye ngo yishyure, ariko ikomeza guhura n’ingorane zo kurangiza neza imbere y’izamu. Umutoza wa Rayon Sports yakoze impinduka ngo ashyire imbaraga mu busatirizi, ariko AS Kigali yakomezaga kurinda neza.
Ku munota wa 85’, AS Kigali yashyizemo ikindi gitego cyakomerekeje bikomeye ikipe ya Rayon Sports ndetse iyica intege, cyatsinzwe na Dushimimana Olivier “Muzungu,” watsinze ashyira umukino kure ku buryo Rayon Sports itongeye kubona amahirwe yo kugaruka mu mukino.
Muri rusange, AS Kigali yagaragaje gukura, gukina bafite gahunda no gukora ibindi biba bibaranga birimo kwihangana no gukora cyane. Rayon Sports yo isabwa gusubira mu masomo ikareba icyuho kiri mu busatirizi no mu buryo bwo gufata neza umukino mu minota ikomeye.
Umukino urangira Rayon Sports 0-2 AS Kigali, intsinzi ifasha AS Kigali gukomeza guhangana mu myanya y’inyuma mu gihe Rayon Sports itakaje amanota akomeye imbere y’abafana bayo .
