Ikigo cy’Igihugu Gishinzwe Guteza Imbere Imiturire (Rwanda Housing Authority – RHA) cyatangaje ko imirimo yo kubaka no kwagura Ibitaro bya Masaka mu Mujyi wa Kigali iyingayinga ikigero cya 96%, ishyira ku mugaragaro ko ibikorwa byo kwimurira ibitaro bya CHUK muri ibi bikorwa bishya bizaba vuba aha ibitaro birangiye 100%.
Imirimo yo kwagura ibi bitaro ni igikorwa kinini cyateguwe mu rwego rwo kunoza no kwagura serivisi z’ubuvuzi ku rwego rwo hejuru mu gihugu, hibandwa ku gukemura umubare munini w’abarwayi ibitaro bya CHUK bisanzwe bihura nawo kubera ubuto bw’ahantu ndetse n’ibibazo byubwinshi bw’abarwayi. CHUK, kimwe mu bitaro bikuru mu Rwanda, gisanzwe gikorera mu Karere ka Nyarugenge mu mujyi , mu gice kiri imbere ya Serena Hotel, kikaba giteganyijwe kwimurwa mu rwego rwo gutanga serivisi zisobanutse kandi zigezweho.
RHA yatangaje ko ibikorwa byo kubaka byaranzwe n’ikoranabuhanga rihamye mu gutunganya inyubako zifite ibyumba byisumbuyeho, ibikoresho by’ubuvuzi bigezweho, ibitanda bihagije ndetse n’ibyumba by’ubuvuzi byihariye birimo laboratwari, ibitaro by’inkondo y’umwana, ibyumba by’abarwayi barembye (ICU), n’ibyumba by’amasaha yihutirwa (Emergency). Ukurikije uko iki gikorwa cyateguwe, Ibitaro bya Masaka bizajya byakira abarwayi benshi kurusha uko byari bisanzwe, byongera umwanya w’ubuvuzi bw’indembe ndetse bigaha inzira ubuvuzi bwisumbuye ku rwego rw’igihugu, birushaho gutuma urwego rw’ubuzima rugera ku muturage mu buryo buhamye.
Ku ruhande rw’abaturage, intambwe nk’iyi yashimwe cyane, kuko hari aho bigaragaye ko ubuto bw’ibitaro bya CHUK n’umubyigano mwinshi byagoranaga imikorere ya buri munsi. Uyu mushinga uteye imbere ushimangira icyerekezo cy’u Rwanda cyo kubaka ubuzima bufite ireme, bushingiye ku kubungabunga ubuzima bw’umuturage nk’urufatiro rw’iterambere ry’igihugu.
✍️ Inkuru yateguwe na MUCYO Felicien
