Mu gitondo cyo ku wa 9 Ukwakira 2025, inkuru y’akababaro yaturutse muri Transparency International Rwanda (TI-Rwanda) yamenyesheje ko Marie Immaculée Ingabire, wari Umuyobozi w’Inama y’Ubutegetsi y’uyu muryango, yitabye Imana nyuma y’igihe arwariye. Ubutumwa bwa TI-Rwanda bwavuze mu magambo yuje agahinda ko “yapfuye mu gitondo nyuma y’igihe gito arwaye,” buhita butuma benshi mu bamuzi n’abamukundaga bagwa mu kantu.
Marie Immaculée Ingabire, w’imyaka iri hagati ya 63 , yavukiye mu gihugu cya Burundi, ariko akurira mu Rwanda yahungiye kandi muri Republika iharanira demokarasi ya congo aho yakomeje urugendo rwe rw’ubuzima n’ubwitange mu kurwanya ruswa nakarengane no guharanira imiyoborere myiza. Yari umunyamwuga w’itangazamakuru, umufatanyabikorwa wa Leta n’imiryango itegamiye kuri Leta, ndetse n’umuvugizi ukomeye w’uburenganzira bwa muntu n’uburinganire.
Mu buzima bwe bwose, Ingabire yari azwi nk’umugore utavuga rumwe n’ibitagenda neza, akunda kubaza ibibazo no gusaba ibisobanuro ku ikoreshwa ry’umutungo rusange. Yabaye ijwi ritajegajega mu guharanira ubunyangamugayo, ubwisanzure n’imikorere ihwitse mu nzego zose z’igihugu. Abenshi bamufataga nk’umuntu utararangwaga n’ubwoba, wizeye ko ukuri ari ko guha agaciro umuyobozi n’igihugu.
Muri Transparency International Rwanda, Ingabire yari amaze imyaka myinshi ayobora ibikorwa by’ingenzi byo guhashya ruswa, gukurikirana imikoreshereze y’umutungo wa Leta, ndetse no gukangurira abaturage gutinyuka gutanga amakuru ku bikorwa bitemewe. Ubwitange bwe bwatumye anavugwa nk’umwe mu banyapolitiki b’abagore bafite ijambo rikomeye mu gihugu no mu karere.
- Yatangiye gukora mu itangazamakuru, akaba yari umunyamakuru muri Office Rwandaise de l’Information (ORINFOR).
- Yagize uruhare mu gushinga no gukorana n’imiryango y’abagore n’iy’uburenganzira bwa muntu, nka PROFEMME Twese Hamwe, HAGURUKA, na Rwanda Women Network.
- Ku rubuga rw’ishami rya TI-Rwanda, bavuga ko Ingabire yagiye ahabwa amajwi kandi yatorewa kuyobora Inama y’Ubutegetsi (Chairperson) kuva mu 2007, ariko yatorewe indi manda muri 2021-2026.
- Mu bihe by’ubuyobozi bwe, TI-Rwanda yigeze guhabwa igihembo cy’Ikigo cy’Imiyoborere mu Rwanda (RGB) mu 2012 kubera kuba umuryango wagaragaje ibikorwa byiza mu miyoborere.
- Ibikorwa byayo birimo gutegura ubushakashatsi nka Rwanda Bribery Index, gukorana n’inzego za Leta n’abikorera mu kurwanya ruswa, no gukangurira abaturage kugira uruhare mu kugaragaza ibitagenda neza.
Abari bamuzi bavuga ko yari umuntu wicisha bugufi ariko udashobora gucisha bugufi ku kuri. Yari asanzwe avuga ko “kurwanya ruswa si urugamba rw’abayobozi gusa, ahubwo ari inshingano ya buri munyarwanda ushaka iterambere ry’igihugu.” Aya magambo ye yasigaye yibukirwa na benshi nk’isomo ryimbitse mu guharanira u Rwanda rucyeye mu mikorere no mu bitekerezo
Amakuru y’urupfu rwe yakiriwe n’ishavu rikomeye n’abayobozi batandukanye mu nzego za Leta, imiryango itegamiye kuri Leta ndetse n’abaturage basanzwe. Abamukomokaho bavuze ko yari “umugore w’intwari, waguhaga icyizere mu kubaka igihugu gishingiye ku mico, ubupfura n’imiyoborere myiza.”
Nubwo yitabye Imana, umurage we ukomeje kubaho mu bikorwa by’iterambere n’imiyoborere myiza yashinze imizi mu Rwanda. Marie Immaculée Ingabire yasize isomo rikomeye ku rubyiruko, cyane cyane ku bakobwa n’abagore, ko ubutwari mu buyobozi bushingira ku guharanira ukuri no gukorera rubanda.
Transparency International Rwanda ndetse n’abaturage benshi bamusabiye kuruhukira mu mahoro, banavuga ko ibikorwa bye bizahora ari urwibutso rw’umugore witanze ku gihugu atagamije inyungu, ahubwo ashaka u Rwanda rutagira ruswa n’akarengane.
