Mu myaka iheruka, u Rwanda rwahindutse umwe mu mitima y’Isi yakira inama n’ibirori bikomeye by’amateka, bikerekana ubushobozi n’ubushake bwo gushyira igihugu mu rwego mpuzamahanga.
Mu 2022, u Rwanda rwakiriye Commonwealth Heads of Government Meeting (CHOGM), ihuriro rikomeye ryahuje abakuru b’ibihugu na za guverinoma bo mu muryango wa Commonwealth. Byari ibyumweru byerekanye ubudasa bw’u Rwanda mu mitegurire no mu kwakira abakuru b’ibihugu.
Mu 2023, Kigali yakiriye FIFA Congress, inama ngarukamwaka y’ishyirahamwe ry’umupira w’amaguru ku isi, yabereye bwa mbere muri Afurika y’Iburasirazuba. Ibi byerekanye ko u Rwanda ruri mu bihugu byizewe mu kwakira ibirori bikomeye bya siporo.
Mu 2024, u Rwanda rwongeye kuba ku isonga ubwo rwakiriye FIA Awards, ibihembo bitangwa n’ishyirahamwe ry’imodoka ku isi. Ni ubwa mbere ibi birori byari bibereye muri Afurika, bikaba byarashimangiye Kigali nk’umurwa mukuru w’imikino n’imyidagaduro.
Kuri ubu muri 2025, u Rwanda ruri mu byishimo byo kwakira Shampiyona y’Isi y’Amagare (UCI Road World Championships), irushanwa ry’amateka ryitabiriwe n’abakinnyi bakomeye ku isi ndetse n’abafana baturutse imihanda yose.
Tukiri kumagare ,i Kigali hatangiye icyumweru cy’amateka mu mukino w’amagare, aho u Rwanda rwabaye igihugu cya mbere muri Afurika mu kwakira Shampiyona y’Isi y’Amagare ya 2025. Uyu munsi wa mbere w’iri rushanwa wagaragaye nk’intangiriro y’icyumweru giteye amatsiko no kwishimira iterambere rya siporo ku rwego rw’isi.
Mu butumwa bwatanzwe, hashimiwe cyane Perezida wa Repubulika y’u Rwanda, Paul Kagame, ku buyobozi bwe bw’icyerekezo cyatumye u Rwanda rubasha kwakira isi yose muri iri rushanwa rikomeye. Byagarutsweho ko ari amahirwe akomeye u Rwanda rufite yo kwerekana ubushobozi, umuco n’ubushake bwo guteza imbere siporo.
Harashimiwe kandi Perezida wa Union Cycliste Internationale (UCI), David Lappartient, ku bufatanye ndetse n’abafana baturutse impande zitandukanye ku isi ndetse n’abanyarwanda bitabiriye ari benshi. Uruhare rwabo rufatwa nk’ingirakamaro cyane kuko ari rwo rutuma iri rushanwa riba iry’ikirenga.
Abanyarwanda n’inshuti z’u Rwanda basabwe gukomeza kwitabira ari benshi, bakishimira siporo y’amagare, bakakira neza abashyitsi ndetse bagaragaza isura idasanzwe y’igihugu. Ni amahirwe yo gusiga amateka no kongera kwemeza ko “U Rwanda rweme” mu kwakira ibirori mpuzamahanga by’imikino no kubibyaza umusaruro mu bukerarugendo n’iterambere ry’igihugu.
