Urubyiruko 12 rw’Abanyarwanda rutuye muri Afurika y’Epfo ruri mu ruzinduko rw’iminsi icumi mu Rwanda, rugamije kongera kumenya amateka y’igihugu, gusobanukirwa n’uruhare rwabo mu iterambere n’icyerekezo cy’igihugu cyabo.
Kuri uyu wa Gatatu, uru rubyiruko rwasuye icyicaro gikuru cy’Ingabo z’u Rwanda (RDF), aho rwakiriwe n’Umuvugizi w’Ingabo, Brigadier General Ronald Rwivanga, wari uhagarariye Umugaba Mukuru w’Ingabo z’u Rwanda.
Mu kiganiro yahaye uru rubyiruko, Brig Gen Rwivanga yasobanuye uburyo RDF yubatse umurongo mushya w’imikorere nyuma ya Jenoside yakorewe Abatutsi mu 1994, ishyira imbere umutekano, ubumwe bw’Abanyarwanda n’iterambere ry’igihugu. Yagarutse ku rugendo rwo kwiyubaka kw’Ingabo z’u Rwanda, zivuye mu bihe bikomeye kugeza zigeze ku rwego rwo kuba zimwe mu ngabo zifite ubunyamwuga n’ubushobozi mu karere.
Yanibukije uru rubyiruko ko amahoro n’iterambere igihugu gifite uyu munsi byaturutse ku gukunda igihugu no kurirwanira, abasaba gukomeza kugira uruhare mu kurinda ibyo u Rwanda rumaze kugeraho.
Uru ruzinduko ruri mu bikorwa bitegurwa hagamijwe gufasha urubyiruko rw’Abanyarwanda baba mu mahanga kumenya neza amateka y’u Rwanda, gusobanukirwa indangagaciro z’ubumwe, ubunyarwanda n’ubwitange, nk’inkingi zikomeye zishingiyeho iterambere ry’igihugu.
