Rwanda Premier League (RPL) yihanangirije bikomeye ibinyamakuru bikomeje gushyira amashusho y’imikino (highlights) kuri za Channel za YouTube zabyo mu buryo bunyuranyije n’uburenganzira bwo gusakaza ayamashusho kuko star time itabyemera , ibitegeka gukuraho ako kanya izo video cyangwa bikazafatirwa ibihano bikarishye.
Ibinyamakuru byagaragajwe muri ubu butumwa birimo B&B Kigali, TV10, RN Citizen, SK FM na Inyarwanda, byose bishinjwa gukoresha amashusho y’imikino ya shampiyona y’igihugu batabifitiye uburenganzira kuma youtube yabyo, ibyo RPL ivuga ko bitera igihombo cy’ubucuruzi ku mufatanyabikorwa ufite uburenganzira bwo kubyerekana bwa mbere, gusa bimwe muribo bakibona ubu butumwa bahise bazisiba kumbuga zabo za youtube.
Mu butumwa bwatanzwe mu rwego rwo guha gasopo, RPL yagize iti: “Nje gutanga warning. Ibinyamakuru byashyize highlights za Rwanda Premier League kuri Channel za YouTube zabyo, ntabwo byemewe kandi mwabikoze mubizi. Please mwabikuraho hakiri kare.” Iri tanagazo rije mu gihe hari hashize igihe hibazwa ku mikorere y’imbuga z’itangazamakuru zungukira kuri aya mashusho mu buryo budafite uburenganzira bwa copyright.
RPL yasabye ibitangazamakuru gukorana n’uruhande rufite uburenganzira, gukoresha ama video byemewe, ndetse no kwirinda gukora ibikorwa bishobora kubahombya mu buryo bw’amategeko n’umwuga.
Aya mabwiriza afatwa nk’intambwe yo kunoza uburyo bw’itangazamakuru ryo mu Rwanda, kongera umuco wo kubahiriza amategeko ya copyright no gufasha iterambere rya siporo ku rwego rw’igihugu. Abatabyubahiriza, RPL iravuga ko “nta mpuhwe zizakoreshwa.”
