Umuyobozi Mukuru wa Polisi y’u Rwanda, CG Felix Namuhoranye, ari kumwe n’itsinda ayoboye, basuye icyicaro cya Polisi ya Indonesia (Indonesian National Police) aho bakiriwe n’Umuyobozi Mukuru wayo, General Listyo Sigit Prabowo. Iyi nama yasoje isinywemo amasezerano y’ubufatanye hagati ya Polisi y’u Rwanda n’iya Indonesia, agamije gushimangira imikoranire mu kurwanya ibyaha n’iterambere ry’inzego z’umutekano.
Umuhango wo gushyira umukono kuri ayo masezerano wabereye mu mujyi wa Jakarta, witabirwa n’Ambasaderi w’u Rwanda muri Indonesia, Sheikh Abdul Karim Harelimana. Aya masezerano azibanda cyane ku guhanahana amakuru n’ubumenyi, amahugurwa y’abapolisi, no kurwanya ibyaha byambukiranya imipaka birimo iterabwoba, icuruzwa ry’abantu, ikoreshwa ry’ibiyobyabwenge, n’ibyaha bikorerwa kuri murandasi.
CG Namuhoranye yashimye ubuyobozi bwa Polisi ya Indonesia ku mikoranire myiza imaze igihe hagati y’ibihugu byombi, avuga ko aya masezerano ari intambwe ikomeye mu gukomeza kubaka ubushobozi n’ubunyamwuga mu nzego zishinzwe umutekano.
Ku ruhande rwe, General Listyo Sigit Prabowo yashimangiye ko u Rwanda ari igihugu gifite imiyoborere myiza n’imikorere y’inzego z’umutekano ishobora gufasha mu kungurana ubumenyi n’ubunararibonye.
Ubufatanye bwa Polisi zombi buzajya bunafasha mu bikorwa byo guhugura abapolisi, gusangira ubunararibonye mu by’imiyoborere, no gushyiraho uburyo buhoraho bwo guhanahana amakuru mu guhangana n’ibyaha bihungabanya umutekano ku rwego mpuzamahanga.
