Kuri uyu wa Gatanu, tariki ya 12 Nzeri 2025, Polisi y’u Rwanda yatangaje ko yatangiye ibikorwa byo gushakisha abakekwaho gukubita no gukomeretsa umuturage mu Kagari ka Rwampara, Umurenge wa Nyarugenge, aho amashusho yabigaragazaga yakwirakwijwe ku mbuga nkoranyambaga.
Mu itangazo rya mbere ryasohowe, Polisi y’u Rwanda yavuze ko umwe mu bakekwaho icyo gikorwa yari amaze gufatwa, ndetse hashyirwaho ingufu mu gushakisha abandi babiri bari kumwe nawe. Nyuma y’amasaha make, Polisi yongeye gutangaza ko n’abandi babiri basigaye bafashwe bose.
Ubutumwa bwa Polisi bwagiraga buti: “Turabamenyesha ko abantu babiri bari basigaye mu mashusho bakorera igikorwa cy’ubugome umuturage wo mu Kagari ka Rwampara bose bafashwe. Murakoze.”
Ibi bikorwa by’ubugizi bwa nabi byabereye mu murenge wa Nyarugenge ku wa 11 Nzeri 2025, aho abashinzwe umutekano batangaje ko bafashe ingamba zo gukora iperereza ryimbitse kugira ngo hamenyekane impamvu yabyo, ndetse n’ibyaba byarateye abo bantu kwivanga mu bikorwa byo gukomeretsa umuturage.
Polisi y’u Rwanda yakomeje gusaba abaturage gukomeza gufatanya n’inzego z’umutekano batanga amakuru ku gihe kugira ngo ibikorwa nk’ibi bihungabanya ituze ry’abaturage bicike burundu.
Iperereza riracyakomeje kugira ngo hamenyekane imvano nyayo y’iki gikorwa ndetse hanashyirweho ingamba zo kurinda ko byongera kubaho.
