Perezida wa Repubulika y’u Rwanda, Paul Kagame, yageze kuri Rwanda Military Academy – Gako, aho yayoboye umuhango wo gusoza amasomo no guha ipeti abasirikare bashya barenga 1000 baturutse mu byiciro bitatu by’amahugurwa y’Ofisiye.
Aba basirikare barangije amasomo mu byiciro bitandukanye birimo: 06/20 Long, aho abanyeshuri barangije amasomo y’imyaka ine ahuriza hamwe amasomo ya Kaminuza ku rwego rwa Bachelor’s Degree n’aya gisirikare; 12/24 One Year, cyamaze umwaka umwe; ndetse na 08/25 Short, cyamaze amezi icyenda gusa kigamije gutegura abasirikare bashya mu buryo bwihuse.
Mu ijambo rye, Perezida Kagame yashimye uburyo aba basirikare bagize umwete n’ubwitange mu kwihanganira imyitozo ikomeye, avuga ko u Rwanda rukeneye abasirikare bafite ubushobozi bujyanye n’ibihe igihugu n’isi muri rusange bicamo. Yibukije ko kuba umusirikare ari ugusigasira umutekano n’ubusugire bw’igihugu, ndetse no guharanira inyungu rusange z’abaturage b’u Rwanda.
Perezida Kagame yanagarutse ku kamaro k’ubufatanye hagati y’inzego z’uburezi n’iz’umutekano, yemeza ko amasomo nk’aya afasha igihugu kugira abasirikare bazi neza inshingano zabo kandi bafite ubushobozi bwo guhanga udushya no gucunga neza ibibazo by’umutekano.
Umuhango wabereye i Gako witabiriwe n’abayobozi bakuru mu nzego z’umutekano, imiryango y’abarangije amasomo ndetse n’abashyitsi batandukanye. Abasirikare bashya bahawe ipeti ry’Ofisiye basabwe gukoresha ubumenyi bahawe mu gukomeza guteza imbere ingabo z’u Rwanda no kurinda umutekano w’abaturage.
Uyu muhango ugaragaza ubushake bw’u Rwanda mu gukomeza kubaka ingabo zifite ubumenyi buhanitse, zishoboye kurengera igihugu no kugira uruhare mu kubungabunga amahoro ku rwego mpuzamahanga.
