Kuri uyu wa Mbere mu masaha ya nimugoroba, muri Village Urugwiro, Perezida wa Repubulika y’u Rwanda, Paul Kagame, yayoboye umuhango w’irahira ry’abaminisitiri bashya baherutse kugirirwa icyizere mu mirimo mishya. Abo barahiriye ni Juvenal Marizamunda wagizwe Minisitiri w’Ingabo, Consolée Uwimana wagizwe Minisitiri w’Uburinganire n’Iterambere ry’Umuryango, ndetse na Yves Iradukunda wagizwe Minisitiri wa Leta muri Minisiteri y’Ikoranabuhanga n’Ubuvumbuzi.
Mu muhango wari wuje icyubahiro, Perezida Kagame yibukije abayobozi bashya ko kuba umuyobozi mu Rwanda ari ibisanzwe ariko bagomba kumva neza inshingano nuburemere bwazo,yasobanuye kandi ko uburemere bwizo nshingano aribyo abayobozi bakorera igihugu nabanyagihugu ndetse nabanyarwanda muri rusange kandi ko aribo bagomba kureba, batagomba kwireba bwamere,yakomeje avuga kandi ko barahiriye ukwitangira abaturage, atari ukubayobora mu nyungu bwite. Yabashimiye kuba bemeye izo nshingano, abibutsa ko igihugu gikeneye abayobozi batinya gutakaza umwanya, ariko badatinya gukora ibintu bitanga umusaruro.
Marizamunda yavuze ko azashyira imbere kubaka ingabo kinyamwuga kandi zihora ziteguye kurinda igihugu no gutanga umusanzu mu iterambere. Uwimana Consolée we yagaragaje ubushake bwo gukorera imiryango nyarwanda hagamijwe kongera imbaraga mu buringanire n’uburenganzira bwa buri wese, naho Iradukunda Yves yizeza gukomeza gushyigikira politiki z’igihugu zifite ishingiro ku ikoranabuhanga nk’imwe mu nkingi z’iterambere ry’igihugu.
Uwo muhango witabiriwe n’abayobozi batandukanye bo mu nzego z’umutekano, abahagarariye inzego za Leta n’abandi bayobozi bakuru, aho bose bishimiye kwakira abinjira mu nshingano nshya zifite uruhare runini mu miyoborere y’igihugu.
