Kigali – Mu ruzinduko rwa Leta rwa Perezida Bassirou Diomaye Faye w’igihugu cya Senegal mu Rwanda, Perezida Paul Kagame yagaragaje ko Afurika ifite urubyiruko rufite impano n’imbaraga zidasanzwe, ariko ashimangira ko rukwiye guhabwa umusingi uhamye n’uburyo burambye bwo gukoresha izo mbaraga mu nyungu z’iterambere ry’umugabane.
Perezida Kagame yavuze ko we na mugenzi we Faye bahuzwa n’icyifuzo kimwe cyo kubaka Afurika ishingiye ku bumenyi, amahoro n’ubutabera, aho urubyiruko rutazaba abarebera gusa ahubwo rukazaba urufunguzo ruhamye rw’iterambere ry’ejo hazaza hibihugu.
Uru ruzinduko rwaje gukomeza ndetse no gushimangira umubano mwiza umaze igihe ugaragara hagati y’u Rwanda na Senegal, aho impande zombi zemeranyije gushimangira ubufatanye mu nzego zitandukanye zigihugu zirimo ikoranabuhanga, uburezi, ubucuruzi, n’ihangwa ry’imirimo myinshi cyane cyane igenewe urubyiruko.
Perezida Faye, uzwi nk’umwe muba perezida bakiri bato bayoboye igihugu muri Afurika, yashimye uburyo u Rwanda rwubatse uburyo bufasha urubyiruko kuba igisubizo mu iterambere ryihuse ry’igihugu, avuga ko ari isomo rikomeye cyane Senegal ishaka kwigira ku Rwanda kuva none.
Ibi biganiro byombi byerekanye ko ubumwe n’ubufatanye bw’ibihugu bya Afurika bushobora kuba igisubizo ku bibazo by’umugabane, cyane cyane mu gihe urubyiruko rwubakiwe imiyoborere yita ku mahirwe arambye yaruteza imbere kuko biteza imbere nigihugu.
