Perezida wa Repubulika y’u Rwanda, H.E Paul Kagame, yongeye kugaruka ku kibazo cy’imikorere y’amwe mu nsengero n’uruhare zigira mu mibereho y’Abanyarwanda, agaragaza ko hari aho zigaragara zidahuza n’intego yo guteza imbere umuryango nyarwanda. Mu butumwa bwe, Umukuru w’Igihugu yavuze ko hari imyumvire ikwiye guhinduka, abantu bagakuramo ibitekerezo bisigaye byaracengejwe na kolonialisme, bikadindiza iterambere ryabo n’iry’igihugu.
Perezida Kagame yagaragaje ko gusenga atari ikibazo, ahubwo ikibazo ari imikorere y’ahantu hahawe izina ry’insengero ariko ntihahindure umuntu, ahubwo hakaba henshi hose usanga hatera ibibazo mu muryango nyarwanda. Yavuze ko hari aho bigaragara ko inyigisho zitangwa zidafasha abantu gutera imbere, ahubwo zikababuza gukora no kwiteza imbere mu mibereho ya buri munsi.
Mu magambo ye yavuzemo gutebya, Umukuru w’Igihugu yavuze ko “bishoboka zose yazifunga”, yerekana uburyo hari insengero nyinshi zishobora gukora mu buryo budatanga umusaruro ku buzima bw’igihugu n’abagituye. Yibukije ko gusenga ari ingenzi, ariko ko atagomba kuba intandaro yo kwirengagiza inshingano z’umuryango cyangwa gusigara inyuma mu iterambere.
Yashimangiye ko igihugu gikenera abaturage bafite imyumvire iboneye, abazi gushyira mu gaciro no kubyaza umusaruro amahirwe bafite. Yanavuze ko iterambere ritangwa n’ibikorwa bifatika, atari amagambo cyangwa imigenzo idafite aho igeza abantu.
Perezida Kagame yasoje asaba Abanyarwanda gukomeza kwimakaza umuco wo gukora, kwigira no kubaka imiryango ikomeye ndetse ko abifuza akazi ka leta bose batagahabwa kuko igihugu kitarekura ingengo yimari yose kubakozi ahubwo bagomba gukora cyane bakikorera, kuko ari rwo rufunguzo rwo kugera ku Rwanda rukataje mu iterambere kandi rufite abaturage bafite icyerekezo gisobanutse.
