Ukwakira ni ukwezi gushya, ariko nanone ushobora kukugira intangiriro y’indi ntambwe nshya mu buzima bwawe. Abahanga mu by’ubuzima bavuga ko kugira amagara mazima atari iby’amahirwe gusa, ahubwo ari iby’imyitwarire umuntu yigisha umubiri we buri munsi.
Kurya ku gihe ni kimwe mu by’ingenzi mu buzima, aho inzobere mu buzima zigaragaza ko kurya ku mugoroba bitarenze saa mbili z’ijoro ari byiza, hanyuma ugakomeza wifashisha amazi gusa. Ibi bifasha kwirinda umubyibuho ukabije no kugira ibitotsi byiza. Nanone, kuryama kare mbere ya saa yine z’ijoro no kubona amasaha 7–8 y’ibitotsi bihagije bifasha umubiri wose kongera imbaraga no kuruhuka neza.
Gutangira umunsi n’amazi nabyo ni ingenzi, aho mu minota mike umaze gukanguka usabwa gufata ibirahuri bibiri cyangwa bitatu by’amazi ashyushye cyangwa ari ku gipimo cy’icyumba. Hari n’abongeramo indimu, concombre cyangwa vinegar, ariko bikaba byitonderwa kuko bishobora kugira ingaruka ku bantu bamwe. Uburyo bwo kwirinda kurya hakiri kare (intermittent fasting) nabwo bufasha kugabanya ibinure, kugenzura ibiro no kurinda indwara nka diyabete.
Kugira amagara mazima bisaba kandi kureka ibiryo byangiza nk’isukari nyinshi, ibinyobwa bisindisha, inyama z’inyunganiramirire n’amavuta atari meza. Mu byo umuntu agomba kugabanya harimo ibikomoka ku ifu isukuwe n’ibiribwa bitetse mu mavuta menshi. Aha ni ho imboga, imbuto n’ibiribwa bifite intungamubiri nk’avoka, imbuto z’amavuta, amavuta ya elayo n’ibirungo nk’uturmeric na tangawizi bihabwa agaciro gakomeye.
Hari kandi ibinyobwa bifite umumaro nk’icyayi cya matcha gifasha kugabanya stress, gutwika ibinure no kongera imbaraga, bityo kikaba cyasimbura ikawa nyinshi. Abashoboye bashobora no kwifashisha inyunganiramirire nka Vitamin D, Omega-3, Probiotics, Magnesium na B-complex vitamins. Ku bafite imyaka irenga 45, hari n’ibindi byunganira byihariye ku buzima bwabo.
Imyitozo ngororangingo nayo ni ingenzi mu mibereho, aho byibura iminota 180 mu cyumweru ituma umubiri ugira ubuzima buzira umunaniro. Iyi myitozo igizwe na cardio, guterura ibyuma, HIIT no kwiyoroshya. Ariko byose byuzuzwa no gutangira no gusoza umunsi mu isengesho, kuko isengesho rigarura ituze mu mutima, rikongera ibyishimo no kugabanya stress.
Icy’ingenzi ni uko ubuzima bwiza atari ukugira iminsi myinshi yo kubaho gusa, ahubwo ari ukugira iminsi yuzuye ibyishimo, gukunda abandi no gukorera Imana. Ukwakira rero ushobora kuwugira ukwezi kw’impinduka mu buzima bwawe, uhereye ku ngingo nke wakurikiza none, hanyuma ugakomeza buhoro buhoro kugeza ubaye umuntu mushya.
