Mu gihe shampiyona ya NBA ya 2025-2026 imaze gusiga amateka mashya nyuma y’uko New York Knicks yegukanye igikombe, ubu amaso y’abakunzi ba Basketball ku Isi yose ahanzwe ku gikorwa gikurikiraho gishobora guhindura ejo hazaza h’amakipe menshi: NBA Draft 2026.
Iyi gahunda yo guhitamo abakinnyi bashya bavuye muri za kaminuza n’andi marushanwa atandukanye izaba ku wa 23 na 24 Kamena 2026 muri Barclays Center i Brooklyn, aho amakipe 30 ya NBA azahatanira kubona impano zitezweho kuzahindura amateka yazo mu myaka iri imbere. NBA Draft ni kimwe mu bikorwa bikurikirwa cyane buri mwaka kuko ari bwo amakipe ahabwa amahirwe yo kongeramo amaraso mashya. Ni na ho havuye ibyamamare nka LeBron James, Stephen Curry, Kevin Durant na Victor Wembanyama, bose bahindutse ibihangange nyuma yo gutoranywa muri Draft.
Uyu mwaka, amakipe menshi yinjiye muri Draft afite icyizere cyo kubona umukinnyi ushobora kubafasha guhatanira igikombe mu myaka iri imbere. Nyuma ya NBA Draft Lottery yabaye muri Gicurasi, ikipe ya Washington Wizards ni yo yegukanye amahirwe yo gutoranya umukinnyi wa mbere, ikurikirwa na Utah Jazz, Memphis Grizzlies na Chicago Bulls. Mu bakinnyi bari kuvugisha benshi mbere y’iyi Draft harimo A.J. Dybantsa, Darryn Peterson, Cameron Boozer na Caleb Wilson. Aba bose bamaze imyaka mike berekana impano idasanzwe muri Basketball y’amashuri makuru na kaminuza, ndetse benshi mu basesenguzi bababona nk’abashobora kuba inyenyeri nshya za NBA mu myaka iri imbere.
Umwihariko wa Draft y’uyu mwaka ni uko nta mukinnyi umwe ugaragara nk’uzatoranywa nta mpaka nk’uko byagenze kuri Victor Wembanyama mu 2023. Ahubwo amakipe menshi aracyari mu biganiro no mu isesengura ryimbitse kugira ngo amenye uwo azahitamo, ibintu bituma habaho amatsiko menshi mbere y’ijoro rya mbere rya Draft. Abasesenguzi bavuga ko Washington Wizards ishobora gukoresha umwanya wa mbere kuri A.J. Dybantsa cyangwa Darryn Peterson, bombi bafatwa nk’abakinnyi bafite ubushobozi bwo kuba ba rutahizamu bakomeye muri NBA. Cameron Boozer, umuhungu w’icyamamare Carlos Boozer wahoze akinira NBA, na we ari mu mazina akomeje kuvugwa cyane.
Ku makipe nka Lakers, Warriors, Bulls na Spurs, Draft y’uyu mwaka ifatwa nk’amahirwe yo kubaka ejo hazaza cyangwa kongera imbaraga ku makipe asanzwe afite intego zo guhatanira igikombe. Ni yo mpamvu muri iki gihe abayobozi b’amakipe, abatoza n’abashinzwe gushaka impano bari gukora amasaha menshi basuzuma buri mukinnyi mbere yo gufata icyemezo cya nyuma. Icyiciro cya mbere cya Draft kizaba ku wa Kabiri tariki ya 23 Kamena, mu gihe icyiciro cya kabiri kizakurikiraho ku wa Gatatu tariki ya 24 Kamena. Ibi bizaba bibaye ku nshuro ya gatatu yikurikiranya NBA itandukanyije amatora y’icyiciro cya mbere n’icya kabiri kugira ngo buri mukinnyi ahabwe umwanya uhagije wo kumenyekana no gusesengurwa.
Ku bakunzi ba Basketball, NBA Draft ntabwo iba ari umuhango wo gutoranya abakinnyi gusa. Ni ijoro riba ryuzuyemo amarangamutima, amarira y’ibyishimo, inzozi zisohozwa ndetse n’inkuru nshya zitangira kwandikwa. Hari abakinnyi bazinjira muri NBA nk’ibihangange byitezweho byinshi, abandi binjire batavugwa cyane ariko nyuma bakazahinduka inyenyeri z’isi. Mu minsi mike iri imbere, Brooklyn izaba ihanzwe amaso n’abakunzi ba Basketball ku migabane yose. Ni ho hazatangirira inkuru nshya z’abasore benshi bamaze imyaka barota gukandagira muri NBA, ndetse ni ho hashobora kuvukira ibihangange bizavugisha isi mu myaka iri imbere.
