Kuri uyu wa gatanu, kuri Stade Amahoro i Remera, habereye ikiganiro n’abanyamakuru cyagarutse ku myiteguro ya Shampiyona y’Isi y’Amagare (UCI Road World Championships 2025) izabera mu Mujyi wa Kigali kuva ku itariki ya 21 kugeza ku ya 28 Nzeri 2025.
Iki kiganiro cyitabiriwe n’abayobozi batandukanye barimo Minisitiri wa Siporo, Mukazayire Nelly; Meya w’Umujyi wa Kigali, Dusengiyumva Samuel; Umuvugizi wa Polisi y’u Rwanda, ACP Boniface Rutikanga; Perezida wa FERWACY, Ndayishimiye Samson ndetse n’Umuyobozi Mukuru ushinzwe Ubukerarugendo muri RDB, Irène Murerwa.
Mu butumwa bwatanzwe, Minisitiri Mukazayire Nelly yashimangiye ko u Rwanda rwiteguye neza kwakira iri rushanwa rikomeye, ndetse ko ibikorwa remezo by’imihanda, amacumbi n’ibindi bikenerwa byose biri gukorwa ku rwego rwo hejuru kugira ngo abakinnyi, abafana n’abashyitsi bazaryitabira bazahabwe serivisi zinoze.
Meya Dusengiyumva Samuel we yagaragaje ko Kigali yiteguye kuba umujyi w’ibirori, aho ibikorwa byo gukomeza isuku, imikorere y’umutekano n’imiturire byashyizwemo imbaraga kugira ngo isura y’umujyi izaheshe ishema Abanyakigali n’Abanyarwanda muri rusange.
Ku ruhande rwa Polisi y’u Rwanda, ACP Boniface Rutikanga yavuze ko hari gahunda zihariye zashyizweho mu bijyanye n’umutekano n’imodoka zizaba zifunze cyangwa zishyirirweho inzira zidasanzwe ku minsi y’amarushanwa, bikazatangazwa hakiri kare kugira ngo abaturage bazabyitegure neza.
Perezida wa FERWACY, Ndayishimiye Samson, yibukije ko iri ari ryo rushanwa rikomeye kurusha ayandi u Rwanda rwakiriye mu mateka yaryo, rikazitabirwa n’ibihugu bitandukanye byo ku isi, ndetse rikaba ari amahirwe akomeye yo guteza imbere umukino w’amagare mu gihugu.
Naho, Irène Murerwa uhagarariye RDB mu by’ubukerarugendo, yashimangiye ko Shampiyona y’Isi y’Amagare izaba uburyo bukomeye bwo kumenyekanisha u Rwanda nk’igihugu cyiza cyakira inama n’ibirori mpuzamahanga, kandi bizongera amahirwe y’ubukerarugendo bw’imbere mu gihugu no ku rwego mpuzamahanga.
Iri rushanwa ritegerejwe nk’imwe mu ngamba zikomeye mu bijyanye n’ubukerarugendo muri 2025, rikazafasha u Rwanda kwiyerekana ku rwego rw’isi nk’igihugu gifite ubushobozi bwo kwakira ibirori bikomeye.
