Cabo Delgado, 10 Ukwakira 2025 – Mu muhango wabereye ku cyicaro gikuru cy’Inzego z’Umutekano z’u Rwanda muri Mozambique, giherereye mu Karere ka Mocímboa da Praia, habaye guhererekanya ubuyobozi hagati ya Maj Gen Emmy K. Ruvusha na Maj Gen Vincent Gatama.
Maj Gen Ruvusha, wari umaze umwaka ayobora ibikorwa by’Inzego z’Umutekano z’u Rwanda muri Cabo Delgado, yashyikirije inshingano umusimbura we, Maj Gen Gatama, nyuma y’umwaka wagaragajemo intambwe ikomeye mu guhashya ibikorwa by’iterabwoba muri iyo ntara.
Mu ijambo rye, Maj Gen Ruvusha yashimye ubwitange n’ubunyamwuga byaranze Ingabo na Polisi z’u Rwanda mu gihe bamaze bakorera muri Cabo Delgado. Yagaragaje ko ubufatanye hagati y’inzego z’umutekano zombi — iz’u Rwanda n’iza Mozambique — bwagize uruhare rukomeye mu kugarura amahoro n’umutekano muri aka gace.
Ku ruhande rwa, Maj Gen Vincent Gatama, ugiye gukomeza izo nshingano, yashimangiye ko azubakira ku bikorwa byamaze kugerwaho kugira ngo umutekano urusheho gushimangirwa. Yavuze ko ubufatanye n’inzego z’umutekano za Mozambique bugomba gukomeza kurangwa n’ubwizerane n’ubufatanye mu kurwanya iterabwoba no kubungabunga amahoro arambye.
Mu gihe cy’umwaka ushize, Inzego z’Umutekano z’u Rwanda zagiye zifatanya na bagenzi babo ba Mozambique mu bikorwa byo kubungabunga umutekano, gufasha abaturage gusubira mu byabo no kongera imibanire myiza hagati y’inzego z’umutekano n’abaturage. By’umwihariko, Ingabo z’u Rwanda zatoje icyiciro cya mbere cy’Ingabo za Mozambique, bigaragaza intambwe mu gukomeza kubaka ubushobozi bw’igisirikare cy’icyo gihugu.
U Rwanda rwagiye rwohereza Ingabo n’abandi bashinzwe umutekano muri Mozambique kuva mu mwaka wa 2021 kugera nanubu kandi birakomeje, mu rwego rwo gufasha icyo gihugu guhashya imitwe y’iterabwoba yari yarayogoje Intara ya Cabo Delgado, izwiho kugira umutungo kamere w’ibikomoka kuri gaze.
