Kuri uyu wa Kabiri, mu rwego rwo kwegera abaturage bose harimo n’abafungiye mu bigo ngororamuco, Umuyobozi w’Umujyi wa Kigali Wungirije ushinzwe Ubukungu n’Imibereho myiza y’Abaturage, Madamu Urujeni Martine, yayoboye Inteko y’Abaturage yabereye mu igororero rya Nyarugenge. Ni inama idasanzwe igamije kumva ibitekerezo by’abagororwa, kumenya ibibazo bibabangamiye ndetse no kubashishikariza gukomeza inzira yo kwiyubaka, kugira ngo bazasubire mu buzima busanzwe bafite intego nshya n’imyitwarire myiza.
Abagororwa bahawe umwanya wo gutanga ibyifuzo no kubaza ibibazo bitandukanye, birimo ibijyanye n’uburezi, imyuga, ubuvuzi ndetse n’imibereho muri rusange. Ibyagaragajwe byose byahawe umurongo ako kanya n’abayobozi bitabiriye, hagamijwe ko n’abafungiye aho bagira uruhare mu iterambere ry’Igihugu. mu butumwa bwe, Madamu Urujeni Martine yibukije abagororwa ko igihe bamara mu igororero kigomba kubafasha kwiyungura ubumenyi no kwikosora, aho kuba igihano gusa.
“Igororero ni ahantu h’ihinduramatwara, si ah’icurabwenge. Uhereye ku kwumva inama n’inyigisho, mugomba gukoresha ayo mahirwe kugira ngo muzave hano muhindutse abantu bashya biteguye gutanga umusanzu wabo mu kubaka igihugu cyacu. yakomeje abasaba gukurikiza amabwiriza bahabwa n’ababakurikirana, kugira ngo igihe cyabo cyo mu igororero kibe icyo kwiga, kwitekerezaho no gutegura ejo hazaza heza.
Abagororwa bitabiriye Inteko bashimye iki gikorwa cyo kubasanga aho bari, bavuga ko byabongereye icyizere ko na bo ari abafite agaciro mu muryango nyarwanda. Umwe muri bo yagize ati:Kuba abayobozi batugana, batwumva kandi bakadufasha, bitwibutsa ko turi Abanyarwanda nk’abandi, kandi ko dufite amahirwe yo kongera kwiyubaka.
Iki gikorwa ni kimwe mu bikorwa Umujyi wa Kigali umaze iminsi ushyiraho mu rwego rwo kwigisha abaturage bose umuco w’imiyoborere myiza n’uruhare rwa buri wese mu kubaka KigaliYacu.
Urujeni Martine yasozaga ashimangira ko intego y’ubuyobozi ari uko “nta muturage usigara inyuma,” ndetse ko n’abari mu bigo ngororamuco ari abanyamuryango b’Igihugu bafite amahirwe yo gusubira mu buzima bushya, bafite icyerekezo n’indangagaciro nshya.
