Mu gitangiriro cy’iki cyumweru, muri politiki yo mu karere hagaragaye umwuka utari witezwe nyuma y’uko uruzinduko rwa Perezida w’u Burundi, Evariste Ndayishimiye, rugombaga kumujyana mu murwa mukuru w’u Bufaransa, Paris, rusubitswe mu buryo bw’igitangaza. Ibi byahise binyuzwa mu itangazamakuru ryo mu Burundi, bisiga ibibazo byinshi mu baturage ndetse no mu mpuguke mu by’umutekano.
Amakuru aturuka imbere mu nzego z’iperereza za Leta ya Bujumbura yemeza ko impamvu yo gusubika uru rugendo irenze iya dipolomasi isanzwe. Biravugwa ko hari ibimenyetso byerekana umugambi ukomeye wo kumuhirika agishingura ikirenge mu Burundi akagana mu Bufaransa.
Kuruyu wa gatanu, tariki ya 31 Ukwakira 2025, i Paris hari hateganijwe inama yihariye yiga ku kibazo cy’umutekano muri Repubulika Iharanira Demokarasi ya Congo, yatumijwe na Perezida w’u Bufaransa Emmanuel Macron. Perezida Ndayishimiye yari mu batumiwe byihariye.Mu rwego rwa dipolomasi, iki cyari gikomeye kuri Bujumbura. Ntibyari bisanzwe ko uruzinduko rw’umukuru w’igihugu rusubikwa ku munota ya nyuma.
Mu gihe kandi Perezida yari ategerejwe, ambasade yari yamaze gutumira Abarundi baba mu Bufaransa kuzitabira inama yo kuganira n’umukuru w’igihugu kuri uyu wa Gatanu, tariki ya 31 Ukwakira 2025. Inkuru yo gusubika uruzinduko yatangajwe nyuma y’uko gahunda zose ziteguwe, ibintu byatumye benshi bibaza uko ikibazo cyaje mu masaha ya nyuma bagatekereza ko umutekano utifashe neza.
Ku rwego mpuzamahanga, abasesenguzi basanga ibi bishobora gutuma u Burundi bugenzura bundi bushya uburyo bwose bwo kurengera ndetse no kurinda umukuru w’igihugu mu ngendo z’inyamahanga. Hari kandi n’igihe ubutumwa bwaba ari ubuhererekanywa hagati y’ibihugu bihanganye mu ruhando rwa dipolomasi.
