Mugihe ubushinjacyaha bukomeje gukusanya ibimenyetso urugo rwa Camarade rwasanzwemo imyenda y’ikipe y’igihugu Amavubi hakibazwa icyo iyo myenda imara murugorwe yakabaye yaratanzwe kubakinnyi si imyenda gusa ahubwo hari nibindi bikoresho by’ikigo byakabaye bitari murugorwe.
Urukiko rukuru rukomeje kandi kuburanisha urubanza ruregwamo Kalisa Adolphe uzwi nka Camarade, Uyu Camarade kandi yahoze ari Umunyamabanga Mukuru w’Ishyirahamwe ry’umupira w’amaguru mu Rwanda (FERWAFA).
Mu byo Ubushinjacyaha bushingiraho bumurega, harimo kuba iwe hasanzwe ibikoresho bya FERWAFA birimo imyenda y’ikipe y’Igihugu, Amavubi, n’ibindi bikoresho by’iri shyirahamwe. Ibi byatangajwe nk’ibimenyetso mu rukiko, bigaragaza uburyo akekwaho kuba yarakoresheje nabi ibikoresho byagenewe ibikorwa bya siporo.
Ubushinjacyaha buvuga ko ibi bikoresho byagombaga gukoreshwa n’ikipe y’Igihugu ndetse n’indi mirimo ya FERWAFA, ariko bikaboneka mu rugo rwa Camarade mu buryo busa n’aho bidafite ibisobanuro byemewe n’amategeko.
Abasesenguzi b’imikino bavuga ko iki kibazo gishobora kugaragaza imikorere idahwitse mu micungire y’ibikoresho bya FERWAFA, by’umwihariko mu bihe aho Amavubi akunze kugaragaza ibibazo bijyanye n’imyambaro cyangwa ibikoresho bidahagije.
Hari abandi bakinnyi n’abahoze bakina mu makipe atandukanye bavuga ko iki kibazo atari ubwa mbere kigaragara, kuko kenshi usanga abakinnyi babura imyambaro cyangwa ibikoresho byo gukoresha mu myitozo, bikarangira byacurujwe cyangwa byaraye mu bigo by’abantu ku giti cyabo, bagatanga urugero kumakipe yo mubindi bihugu byo hanze aho umukinnyi aba yemerewe kwambara umwenda 1 cyangwa umufana yawumusaba akawumuha, ibyo mwikipe y’Igihugu byo ngo ntibyabagamo kuko ngo umukinnyi waburaga umwenda yasabwaga kuwishyura.
Kugeza ubu, urubanza rukomeje kuburanishwa, hakaba hitezwe imyanzuro izafatwa n’Urukiko nyuma yo gusuzuma ibimenyetso byose byatanzwe n’impande zombi.
